Публикации » Пултаруллă çыравçă тăван ялта

23 июля 2016 г.

Аслă Таяпа ялĕнче пысăк уяв пулчĕ. Кунта çуралса ÿснĕ Елена Васильевна Барскаяна /Хĕвелпие/  чысласа  Тĕп урамри 26-мĕш çуртĕнче Хисеп хăми вырнаçтарчĕç.

Елена Васильевна  мĕн ачаран сăвăсем шăрçалать. Хальхи вăхăтра унăн хайлавĕсем час-часах «Грани», «Хыпар», «Возрождение», «Чăваш хĕрарăмĕ», Наци конгресĕ çумĕнчи «Богиня нации!», «Çамрăксен хаçачĕ» тата районти «Елчĕк ен» хаçатсенче пичетленеççĕ. Çавăн пекех сăвăç тĕрлĕ альманахсемпе туслă çыхăну тытать.

2012 çулта хисеплĕ ентешĕмĕр «Оставь свой добрый след...» кĕнеке кăларнă. Тепĕр икĕ çултан унăн «Куç тулли илем» кĕнеки кун çути курнă. Хальхи вăхăтра Елена Васильевна Аслă Таяпа ялĕн историйĕ çинчен «Савнă ялăм - Аслă Таяпа» кĕнекине пичете хатĕрлет.

Елена Васильевнăна  кирек ăçта пырса кĕрсен те хĕвел евĕр ăшă куллипе çынсене савăнтарнăран Хĕвелпи хушма ят çыпăçнă. 2012 çултанпа Чăваш писателĕсен союзĕн членĕнче тăрать вăл.

Ĕмĕрĕпе Чăваш Республикин Шалти ĕçсен органĕсенче службăра тăнăскер професси енĕпе чи лайăххи ята та темиçе хутчен илме тивĕçнĕ. 1982-1997 çулсенче вăл пушар чаçĕнче радиотелефонисткăра тăрăшнă.  Шалти ĕçсен службинче пĕр кăлтăксăр ĕçленĕшĕн панă Хисеп хучĕсем сахал мар унăн.

Пенсие тухнă тесе ахаль лармасть Елена Васильевна Барская: хăйне валли ватлăхра киленĕç тупать. Вăл Раççей Чрезвычайлă лару-тăру министерствин Чăваш Республикинчи управленийĕн пушара хирĕç кĕрешекен службăри ветерансен канашĕн председателĕн çумĕ. Çамрăк чухне общество пурнăçĕнче хастарлăхĕпе палăрнăскер халĕ те вашаватлăхĕпе тĕлĕнтерет. Управленин «Пламя» ансамбльне çÿрет. Çавăн пекех вăл Чăваш обществăпа культура центрĕн «Тарават» ансамблĕн ертÿçи тата хăй пурăнакан Çĕнĕ Шупашкар хулинчи хĕрарăмсен клубĕнчи «Солнечный» ушкăн солистки те. Елена Васильевна  Эмине ячĕллĕ  чăваш наци, Алексей Талвир ячĕллĕ премисен лауреачĕ. Çыравçă юрă-ташă ăсти те, пушă вăхăт тупăнсан вара тĕрлет, çыхать.

Сывă пурнăç йĕркине кăмăллакан маттур хĕрарăм спортпа та туслă. Ĕçленĕ вăхăтра çар тата политика хатĕрленĕвĕн отличникĕ пулнă. Шашкăлла выляса тунă çитĕнÿсем те сахал мар. Ăсталăхшăн, спортри çитĕнÿсемшĕн панă Хисеп хучĕсемпе Тав çырăвĕсем питĕ нумай. Чăваш Республикин Шалти ĕçсен министерствин пушар хурал чаçĕн хисеплĕ ветеранĕн общество пурнăçĕнчи хастарлăхшăн илнĕ ятсене шутласа та пĕтереймĕн. Канăçсăр хĕрарăм кун-çулне халалласа «Жизнь в творчестве» документлă фильм та ÿкернĕ.

Аслă Таяпасем пултаруллă ентешĕпе чăннипех мухтанаççĕ. Ялти культура çуртĕнче хаклă хăнана çăкăр-тăварпа кĕтсе илчĕç. Аслă Таяпа ял тăрăхĕн пуçлăхĕ В.Сапожникова Елена Барская çыравçăна «Аслă Таяпа ялĕн хисеплĕ çынни» хăю çакса ячĕ.

Ялти «Шанчăк» фольклор ушкăнĕ уявра хăйсен юрри-ташшипе савăнтарчĕ. Хисеплĕ хăнапа пĕрле Шупашкартан та паллă çынсем килнĕ. Вĕсем Елена Васильевнăн ырă ĕçĕсене аса илчĕç, общество хастарне пултарулăхра ăнăçу сунчĕç.  Елена Барская хăйне пысăк чыс тунăшăн тав турĕ.

Е.ТЕМЯШКИНА.

Сăнÿкерчĕкре: Е.Барская çемйипе.