20 июля 2016 г.
Пăрачкав салинче «Ачалăх ячĕпе, ачалăхшăн» марафона пĕтĕмлетнĕ. «Раççей ача-пăча фончĕн» республикăри уйрăмĕн председателĕ, йĕркелÿ комитечĕн председателĕ, ЧР Патшалăх Канашĕн депутачĕ Юрий Кислов пĕлтернĕ тăрăх - çирĕммĕш хут иртекен марафона 1680 предприяти-организаци, уйрăм çын хутшăннă. Сăваплă акци пухмачне пĕрлехи вăйпа 7,8 миллион тенкĕлĕх - иртнĕ çулхинчен 600 пин тенкĕ ытларах/ пуянлатнă.
Çав ятпа ирттернĕ савăнăçлă мероприятие Чăваш Ен Пуçлăхĕ Михаил Игнатьев, РФ Патшалăх Думин вĕренÿ енĕпе ĕçлекен комитечĕн председателĕн çумĕ Алена Аршинова, ЧР физкультурăпа спорт министрĕ Сергей Шелтуков, ЧР муниципалитет йĕркеленĕвĕсен канашĕн правленийĕн председателĕ, Шупашкар хула пуçлăхĕ Леонид Черкесов тата Пăрачкав район ертÿлĕхĕ хутшăннă.
Марафонра пухăннă укçа-тенкĕпе йышлă тата сахал тупăшлă çемьесене пулăшаççĕ, больницăсене хальхи кăткăс оборудованипе пуянлатаççĕ, ятарлă препаратсем, тренажерсем, япăх илтекен çул çитмен çамрăксем валли аппаратсем туянаççĕ. Вĕренÿ учрежденийĕсемпе интернат çурчĕсене çĕнĕ сĕтел-пукан вырнаçтараççĕ, тетте, кĕнеке илеççĕ, пĕчĕккисем валли выляв площадкисем çĕклеççĕ. Ачасен пултарулăх ушкăнĕсене те çав шутранах хавхалантараççĕ, уйрăмах пултаруллă çамрăксене социаллă стипенди тÿлеççĕ.
Михаил Игнатьев ачасене пулăшма хутшăннă пуçаруллă ентешсене тав тунă.
- Ыркăмăллăх марафонĕн тĕллевĕ - ачалăха хÿтĕлесси тата пулăшасси. Тĕрĕссипе, пухмача кам мĕн чухлĕ хывни мар, çул çитмен ентешĕмĕрсен пурнăçне лайăхлатмашкăн пирĕнтен кашниех чун ăшшине хĕрхенменни хаклă, - тенĕ вăл. - Ăнтăлуллă çамрăксене пулăшса вĕсене патриотизм воспитанийĕ парасси, аслă ăру çыннисене хисеплеме вĕрентесси - пирĕн тивĕç.
Район çыннисем те сăваплă ĕçе активлă хутшăннă - пухмача 215252,34 тенкĕ хывнă. Пухăннă укçа-тенкĕ районти ачасен пурнăçне лайăхлатнă çĕре каять.
Марафона пĕтĕмлетни сăваплă ĕç вĕçленнине пĕлтермест. Йывăрлăха кĕрсе ÿкнисене яланах пулăшу аллине тăсар. Ырă туни ырăпа таврăнатех.