20 июля 2016 г.
Патшалăх çĕр асăрхавĕн тухăçлăхне ÿстерес тĕллевпе 2015 çулхи пуш уйăхĕнче Раççей Правительстви «Çĕр хутшăнăвĕсен объекчĕсен тĕлĕшĕпе административлă тĕпчев ирттерессин йĕрки çинчен» йышăну çирĕплетнĕ.
Вăл тÿррĕнех ялхуçалăх пĕлтерĕшлĕ çĕрсене тĕрĕслесе тăрассипе çыхăннă. Административлă тĕпчеври çĕнĕлĕх - лаптăка унăн хуçи хутшăнмасăрах тĕпчени. Унпа килĕшÿллĕн уйрăм çыннăн, предпринимательсемпе юридика сăпатĕнчи çынсен çĕрĕсене тĕпчеме ирĕк пур. Ку йышши тĕпчевсене ирттерме прокуратурăран та ирĕк илмелле мар - çакă тепĕр çĕнĕлĕх. Çĕр саккунĕсене пăснин тĕслĕхĕсем пулсан РФ Çĕр кодексĕн 71.1 статйин 6 пункчĕн 2 подпункчĕпе килĕшÿллĕн çак лаптăк тĕлĕшĕпе плана кĕртмен тĕрĕслев ирттереççĕ.
Куславкка районĕнчи Энтри Пасар тата Тĕмшер ял тăрăхĕсен территорийĕсенче ака уйăхĕнче лаптăксем çум курăклă пулнине асăрханă. Çу уйăхĕнче вара инспекторсем тĕрĕслев ирттерес тĕллевпе унта çула тухнă. Россельхознадзорăн Чăваш Енри тата Ульяновск облаçĕнчи управленине килнĕ çăхав тăрăх инспекторсем Куславкка районĕнче планпа палăртнă тĕрĕслевпе пĕрлех административлă тĕпчевсем те ирттернĕ. Куснар ял тăрăхĕнче çĕрпе тĕллевлĕ усă кураççĕ. Анчах кашнийĕ пирки çакна калаймăн.
Муркаш район администрацийĕнчен Ярославка ял çынни тĕлĕшĕпе пĕлтернĕ тĕслĕхе те управлени ĕçченĕсем вырăна тухса тĕрĕсленĕ. Çав вăхăтрах вĕсем плана кĕртнĕ тĕрĕслеве те ирттернĕ. Вĕсен пĕтĕмлетĕвĕсем тăрăх икĕ протокол хатĕрленĕ, çĕре хисеплемен хуçасене 6 пин тенкĕ штраф тÿлеттернĕ. Унсăр пуçне, çитменлĕхсене пĕтерме те хушса хăварнă.
Шупашкар хулинчи пĕр организаци Шупашкар районĕнче çĕре шар кăтартни çинчен пĕлтернине вырăна тухса тĕрĕсленĕ. Тĕрĕсех пĕлтернĕ, 42,67 гектар çинчи пулăхлă сийне строительство япалисемпе хутăштарса янă, 0,24 гектар çинче тимĕр-бетон конструкци юлашкисем йăваланнине тупса палăртнă. Çĕр арендаторне административлă майпа явап тыттарнă. Административлă тĕпчевсем вăхăтĕнче Вăрнар /Пăртас ял тăрăхĕ/, Çĕрпÿ /Паваркасси ял тăрăхĕ/, Çĕмĕрле /Хутар ял тăрăхĕ/, Муркаш /Юнкăпуç ял тăрăхĕ/ районĕсенче çĕр саккунĕсене пăхăнман тĕслĕхсем те çиеле тухнă. Палăртма кăмăллă, Комсомольски, Канаш, Пăрачкав, Патăрьел, Красноармейски, Элĕк, Çĕмĕрле, Сĕнтĕрвăрри районĕсенче хальлĕхе протокол çырма сăлтав тупăнман.
Маларах асăннă йышăнупа килĕшÿллĕн патшалăх тата муниципалитет информаци тытăмĕсенчи, уçă тата пурте усă курма пултаракан информаци ресурсĕсенчи, архив фондĕнчи, патшалăх çĕр мониторингĕ ирттернĕ май тата дистанци меслечĕсене усă курса /çав шутра аэрокосмос ÿкерĕвĕ, тăпра, агрохими, фитосанитари, экологипе токсикологи тĕпчевĕсен результачĕсем/ илнĕ информацие, çĕр ĕçĕсем ирттернĕ май хатĕрленĕ документсене тата ыт. те тĕпе хурса административлă тĕпчевсем ирттереççĕ.
Н.ВАСИЛЬЕВА,
Россельхознадзорăн Чăваш Енри тата Ульяновск облаçĕнчи управленийĕн ĕçченĕ.