16 июля 2016 г.
Эрне пуçламăшĕнче Чăваш Республикин Пуçлăхĕ Михаил Игнатьев Федерацин патшалăх статистика службин ертÿçипе Александр Суриновпа ĕçлĕ тĕлпулу ирттернĕ.
Михаил Игнатьев усăллă тата ĕçлĕ хутшăнусемшĕн Александр Суринова тав тунă. Чăваш Ен Пуçлăхĕ хальхи вăхăтра республикăри районсен кăçалхи пĕрремĕш çур çулхи социаллă пурнăçпа экономика аталанăвĕн кăтартăвĕсене пĕтĕмлетни, малашнехи тĕллевсене палăртни çинчен каласа кăтартнă. Вырăнсене тухса йĕркелекен канашлусенче регионта Пĕтĕм Раççейри ялхуçалăх çыравне ирттерессипе çыхăннă ыйтусене уйрăмах тĕплĕн сÿтсе явнине палăртнă.
Михаил Игнатьев ялхуçалăх ресурсĕсене тĕпчес енĕпе çырав ирттерни çĕршывшăн пысăк пĕлтерĕшлĕ пулнине, çакна шута илсе ăна çÿллĕ шайра ирттерме кирли çинчен каланă. Вăл çирĕплетнĕ тăрăх, республикăра çырав палăртнă йĕркепе, вăхăтлă пулса пырать, халăха кирлĕ информаципе тивĕçтерессине те туллин йĕркеленĕ.
Александр СУРИНОВ, Федерацин патшалăх статистика службин ертÿçи:
- Чăваш Енре Пĕтĕм Раççейри ялхуçалăх çыравĕ çÿллĕ шайра тата пысăк пахалăхпа иртет.
Александр Суринов Чăваш Енре çырав ирттерессине ăнланса тата яваплăха туйса йышăннăшăн тав тунă. Çырав ĕçĕпе çыхăннă ыйтусене республикăра пысăк шайра пурнăçланине, «çыравçăсем вăйлă пулнине, ялхуçалăх ĕçне лайăх пĕлнине» палăртнă. Черетлĕ çыравра информаци пуçтарма пĕрремĕш хут планшетлă компьютерсемпе усă кураççĕ, çакă кăтартусене автоматизацилемелли вăхăта чылай перекетлет.
Тĕлпулура усă курман çĕрсене пусă çаврăнăшне кĕртессипе, ялхуçалăхне аталантарассипе, çынсем официаллă мар йĕркепе ĕçленипе çыхăннă ыйтусене те сÿтсе явнă.