16 июля 2016 г.
пĕлтерĕшлĕ вырăн йышăнма тивĕçлĕ Пĕтĕм Раççейри ялхуçалăх çыравĕ пуçланнăранпа 15 кун иртрĕ. Çĕршыв шайĕнчи мероприятие Елчĕк районĕнче те ăнăçлă йĕркеленĕ. Çак тапхăрта районти виçĕ участокри 21 çыруçă 3 пин ытла объекта çырса тухнă.
Ялхуçалăхĕнчи паянхи чăн-чăн лару-тăру мĕнле пулни çинчен тĕрĕс информаци пухасси, çакна шута илсе отрасле малалла аталантарма майсем туса парасси тата Раççей халăхне хамăр çĕр çинче туса илнĕ пахалăхлă пахча çимĕçпе кирлĕ таран тивĕçтересси çыравăн тĕп тĕллевĕ пулса тăрать. Пĕр сăмахпа, çырава çĕр çыннине малашлăхра пулăшас тĕллевпе йĕркелесе ирттереççĕ. Çавăнпа ыйтусене хуравлама хăрамалла мар. Хăш-пĕр çынсем сас-хура кăларнă пек, çырава налук хурассишĕн ирттерменнине пурин те ăнланмалла. Пухнă информацие пĕтĕмĕшле лару-тăрăва ăнланса тĕрĕс пĕтĕмлетÿсем тăвас тĕллевпе усă курассине патшалăх статистикин органĕсем гаранти параççĕ. Ялхуçалăх таварĕ туса кăларакансен хуравĕсене кĕртнĕ çырав хучĕсенче ыйтса çыракан уйрăм çыннăн ятне-хушаматне палăртмаççĕ. Федерацин «Пĕтĕм Раççей ялхуçалăх çыравĕ çинчен» саккунĕнче тĕпчекен объектсен çырав хучĕсене кĕртнĕ кăтартăвĕсен хÿтлĕх гарантине палăртнă. Çакна шута илсе ялта пурăнакансем хăйсем патне пынă çыравçă ыйтăвĕсем çине уççăн тата тĕрĕс хуравсем памалла.
Михаил ИГНАТЬЕВ, Чăваш Республикин Пуçлăхĕ:
- Пĕтĕм Раççейри ялхуçалăх çыравне ирттерни патшалăхăн ялхуçалăх ресурсĕсене тĕплĕн тишкерме май парать. Унăн кăтартăвĕсем аграри политикине йĕркелемелли тĕп никĕс пулса тăраççĕ, яла социаллă лару-тăру тата экономика тĕлĕшĕнчен çĕнетсе улăштарма, çĕр ĕçченĕн пурнăç пахалăхне ÿстермелли витĕмлĕ мерăсене йышăнма пулăшаççĕ.
...Çырав ĕçĕпе тĕплĕнрех паллашас тĕллевпе эпир Вырăскасси ялĕнче пурăнакан Василий тата Венера Максимовсен уйрăм хушма хуçалăхĕнче пулса куртăмăр. Вĕсем кашни пусăм çĕрпе тухăçлă усă кураççĕ, хăйсене уйăрса панă лаптăкра çулсерен тухăçлă пахча çимĕç туса илеççĕ. Севокпа сухана сутлăх та çитĕнтереççĕ. Унсăр пуçне сăвăнакан икĕ ĕне тытаççĕ, вĕсен пăрушĕсене те самăртаççĕ. Картиш тулли чăх-чĕп.
Патшалăх пĕлтерĕшлĕ мероприяти Раççей ялхуçалăхне аталантарма витĕмлĕ мерăсем йышăнма кирлине лайăх ăнланакан Максимовсем çыруçăн кашни ыйтăвĕ çине тулли хурав панине хамăр курса ĕнентĕмĕр.
С.АНАТОЛЬЕВА.
Сăнÿкерчĕкре: иккĕмĕш участокри Любовь Иванова инструктор Максимовсен хушма хуçалăхĕнче çырав ирттернĕ Оксана Мясникова çыруçăн ĕçне тишкерет.