16 июля 2016 г.
Вырмана тухма хатĕр-и?
Тĕш тырă пухса кĕртме тухиччен шутлă кунсем анчах тăрса юлаççĕ.
Вырма умĕн район администрацийĕн пуçлăхĕ Н.Миллин ялхуçалăх пайĕн специалисчĕсемпе пĕрле яваплă тапхăра мĕнле хатĕрленнине хак парас тĕллевпе «Урожай» ОООна çитсе курнă. В.Кузнецов ертсе пыракан ялхуçалăх предприятийĕнчи йĕтемре тĕш тырă тасатакан çĕнĕ йышши комплекс вырнаçтараççĕ. Район пуçлăхĕ ялхуçалăх культурисен лаптăкĕсем таса, çум курăксăр пулнине, тулли пучахсем пысăк тухăç шантарнине палăртнă.
Район администрацийĕн пуçлăхĕ Н.Миллин ертсе пынипе ĕнер Ленин ячĕллĕ ялхуçалăх производство кооперативĕнче вырма умĕнхи районти канашлу иртнĕ.
Ачасем кĕнеке вулаççĕ
Районти тĕп библиотека ĕçченĕсем ачасене кĕнеке вулама хăнăхтарас тата унпа яланлăх туслаштарас тĕллевпе «Вулакан урам» акци ирттереççĕ.
Малтанхи вулав кунĕсем Комсомольски, Мир урамĕсенче иртнĕ. Ачасем анчах мар, ашшĕ-амăшĕсем те илемлĕ сăнÿкерчĕклĕ, пуян содержаниллĕ кĕнекесемпе кăсăкланса паллашнă. Кунта ачасем хăйсен юратнă кĕнекисем тăрăх ирттернĕ конкурссемпе викторинăсене те хутшăнма пултарнă.