06 июля 2016 г.
Тунтикун район администрацийĕн пуçлăхĕ Н.Миллин райадминистрацин структура подразделенийĕсен, предприятисемпе организацисен ертÿçисемпе, ял тăрăхĕсен пуçлăхĕсемпе канашлу ирттернĕ.
Выльăх-чĕрлĕх апачĕ хатĕрлесси районта мĕнле пыни çинчен район администрацийĕн ялхуçалăх пайĕн ертÿçи П.Тремасов паллаштарчĕ. Районти ялхуçалăх предприятийĕсемпе хресчен /фермер/ хуçалăхĕсенче утă, сенаж хатĕрлес ĕç пырать. Çав вăхăтрах хĕрÿ тапхăр - вырма та çывхарса килет. Çак тĕллевпе районти комисси июнĕн 30-мĕшĕнчен пуçласа ялхуçалăх предприятийĕсемпе хресчен /фермер/ хуçалăхĕсенче вырмана хатĕрленнине тĕрĕслет. Ку енĕпе «Рассвет», «Комбайн», «Прогресс», «Победа», «Сатурн» тата ытти хăш-пĕр хуçалăхсем ăнăçлă ĕçлеççĕ. Вĕсенче паян тесен паян уй-хире тухма хатĕр.
Н.Миллин Питрав иртнĕ хыççăн кĕрхи культурăсене вырса çапма пуçăнмалли, çавăн пекех тырă типĕтмелли комплекссене çĕнетме е çĕнĕрен тума кирлине палăртрĕ. Ку енĕпе кăçал «Комбайн» ЯХПКра тырă типĕтекен çĕнĕ комплекс тăваççĕ, «Урожай» ОООра ăна çĕнетеççĕ.
Район администрацийĕн вĕренÿ тата çамрăксен политикин пайĕн методисчĕ А.Богданова районти шкулсенчен вĕренсе тухакансем патшалăхăн пĕрлехи экзаменĕсене тытнин пĕтĕмлетĕвĕпе паллаштарчĕ. Кăçал экзаменсене тивĕçлипе хаклас тĕллевпе «Ростелеком» АУО вырнаçтарнă системăпа усă курнă. Онлайн режимпа ĕçлекенскер, 16 аудиторинче мĕн пулса иртнине сăнама май панă. Унсăр пуçне экзаменсене панине Чăваш Республикинчи вĕренÿ институтĕнче йĕркеленĕ ситуаци центрĕнчен те сăнаса тăнă. Тĕрлĕ шайри сотрудниксем тăрăшнине, ĕçленине пула экзаменсем районта ăнăçлă иртнĕ. Вырăс чĕлхипе патшалăхăн пĕрлехи экзаменне 149 вĕренекен тытнă. Математикăпа никĕс пайне - 135, профиль пайне 90 выпускник çырнă. Ытти предметсемпе те патшалăхăн пĕрлехи экзаменĕсене тытнă.
Ачасемпе çамрăксен пултарулăх çурчĕн директорĕ Э.Смирнова ачасен çуллахи канăвне йĕркелени çинчен чарăнса тăчĕ. Районти 16 шкул çумĕнче йĕркеленĕ лагерьсенче 705 ача хăйĕн сывлăхне çирĕплетнĕ. Воспитательсем ĕç-хĕле ятарлă программăпа йĕркеленĕ - музейсене, тĕрлĕ куравсене çитсе курнă, экскурсисемпе походсем йĕркеленĕ, спорт вăййисем ирттернĕ. 21 кун пынă ачасен канăвĕ. Çак тапхăрта инкек-синкек пулман. Çитес çулсенче те ачасен канăвне тивĕçлипе йĕркелеме кирлине палăртрĕ район администрацийĕн пуçлăхĕ Н.Миллин.
Канашлăва вĕçленĕ май, Николай Петрович Чăваш Республикин Патшалăх Канашĕн Председателĕ Ю.Попов парнеленĕ «Фоторепортеры на войне» кĕнекине библиотекăсен централизациленĕ тытăмĕн директорне Н.Романовăна пачĕ.
Канашлу хыççăн райадминистрацин пайĕсен ертÿçисем, ял тăрăхĕсен пуçлăхĕсем, ялсен старостисем Елчĕк ял тăрăхĕнчи ялсен масарĕсене тирпей-илем кĕртнипе паллашнă. Вĕсем Элекçей Тимеш, Патреккел, Акчел, Тÿскел масарĕсенче тирпейлĕх хуçаланнине хăйсен куçĕпе курчĕç, çак ялсенчи старостăсен паха ĕç-хĕлне хăйсем патĕнче усă курма тĕллев лартрĕç.
Канашлура ялсенчи çынсене таса шывпа тивĕçтерес тата районшăн пĕлтерĕшлĕ ытти ыйтусене те тишкерчĕç.