06 июля 2016 г.
Çырав ыйтăвĕпе
Пĕтĕм Раççейри 2016 çулхи ялхуçалăх çыравĕ мĕнле пынипе паллашас тĕллевпе иртнĕ вырсарникун пирĕн районта Федерацин патшалăх статистика службин территори органĕн ертÿçи Э.Максимова пулса курнă.
Çырав ыйтăвĕсемпе ĕçлекен районти уполномоченнăйпа Л.Горшковăпа пĕрле вăл Аслă Пăла Тимешри, Елчĕкри тата Çирĕклĕ Шăхалĕнчи инструктор участокĕсене çитсе курнă. Вĕсене пÿлĕмсемпе, сĕтел-пуканпа, çыхăну хатĕрĕпе, техникăпа тивĕçтернине тĕрĕсленĕ, çырав хучĕсемпе паллашнă.
Ĕçлĕ тĕлпулăва пĕтĕмлетнĕ май Чăвашстат ертÿçи пуçламăшĕ лайăх пулнине - Елчĕк районĕнчи çынсем çырава яваплăха туйса, пуçаруллă хутшăннине палăртнă.
С.АНАТОЛЬЕВА.
Мăсăльмансен тĕп уявĕнче
Сăрьелсем ураза-байрама ырă кăмăл-туйăмпа кĕтсе илнĕ.
Чи малтанах ял çыннисене З.Ахметзянов имам пысăк уяв ячĕпе саламланă. Ун çумне Хусантан, Мускавран, Пăваран, Канашран килнĕ сумлă хăнасем те хутшăннă. Унтан пурте пĕрле ялти масар çине кайса вилнисене асăннă.
Хăнасем Кушкă-Сăрьел çулне юсаса çĕнетсен çул тата çывăхланассине пĕлтернĕ.
Р.ХАРИСОВ,
ĕç ветеранĕ.
Юбиляр ячĕпе – ăшă сăмахсем
Кушкăри Елена Мартынова 90 çулхи юбилейне паллă тунă.
Хисеплĕ ĕç ветеранне Аслă Пăла Тимеш ял тăрăхĕн пуçлăхĕ ячĕпе культура ĕçченĕсем саламланă. Е.Портнова Раççей Президенчĕн саламне вуласа панă.
Делегатсем суйланă
«Единая Россия» политика партийĕн Елчĕк районĕнчи вырăнти уйрăмĕн XXIII конференцийĕн пĕрремĕш тапхăрĕ иртнĕ.
Унăн ĕçне партин вырăнти уйрăмĕн секретарĕ Николай Миллин, районти депутатсен Пухăвĕн председателĕ – район пуçлăхĕ Петр Скворцов, ял тăрăхĕсен пуçлăхĕсем, делегатсем хутшăннă.
Конференцире вырăнти парти Федерацин Патшалăх Думине тата Чăваш Республикин Патшалăх Канашĕн суйлавĕсене хутшăнасси пирки калаçнă. «Единая Россия» партин Чăваш Енри регион уйрăмĕн XXIV конференцине кайма Юрий Титовпа Евгения Михайловăна делегата суйланă.
Таврăнаççĕ киле салтаксем
Çурхи призывра Аслă Елчĕк ял тăрăхĕнчи ултă çамрăк Раççей çарĕн ретне тăнă.
Çав вăхăтрах тăван яла салтаксем таврăнма пуçланă. Чи малтанах Александр Чернов, унтан Виктор Архилин тата Николай Петрушкин çар чысне тивĕçлипе пурнăçласа яла таврăннă.