02 июля 2016 г.
Чăваш Республикин транспорт тата çул-йĕр хуçалăхĕн министрĕ Михаил Резников, унпа пĕрле Чăваш Республикин Патшалăх Канашĕн комитечĕн ертÿçи Петр Краснов, «Чувашупрдор» хысна учрежденийĕн директорĕн ĕçĕсене пурнăçлакан Алексей Алексеев пирĕн районта ĕçлĕ визитпа пулнă.
Ĕçлĕ тĕлпулура автомобиль çулĕсем тăвас, вĕсене юсас тата тытса тăрас тĕлĕшпе ыйтусене сÿтсе явнă. Пирĕн районта автомобиль çулĕсем 192,3 çухрăма тăсăлаççĕ, вĕсенчен 55,2 çухрăмĕ - республика пĕлтерĕшли, 137,2-шĕ - вырăнти çулсем. Кăçал районти çул-йĕр хуçалăхĕ валли 36,5 миллион тенкĕ уйăрнă, вĕсенчен вырăнти çулсене тытса тăма 11,4 миллион, автоçулсене юсама /1,6 çухрăм/ - 2,9 миллион тенкĕ. Ялсенчи çулсене те тытса тăма, юсама, çĕнĕрен тума 22,1 миллион тенкĕ палăртнă, унран 1,7 миллион тенкине автоçулсене тытса тăма, 1,2 миллион тенкине çулсене юсама, 19,1 миллион тенкине çулсене çĕнĕрен тума уйăраççĕ.
Михаил Резников, Петр Краснов, Алексей Алексеев, район администрацийĕн пуçлăхĕ Николай Миллин, район администрацийĕн капиталлă строительство тата пурăнмалли çуртсемпе коммуналлă хуçалăх пайĕн ертÿçи Николай Петров, ял тăрăхĕсен пуçлăхĕсем районти çул-йĕр хуçалăхĕпе паллашнă. Акă, республика пĕлтерĕшлĕ «Комсомольски-Елчĕк-Пăва /Тутарстан/» автоçула, пурĕ 3,4 çухрăм, тĕпрен юсассипе «Воддорстрой» ООО ĕçлет. Ăна кăçалхи июль уйăхĕнче хута ямалла. Ĕçсене пурнăçлакан автоçула вăхăтра уçма шантарать. Ку çулпа çыхăнакан ялсенче - Елчĕкре, Акчелте, Патреккелĕнче, Элекçей Тимешре пурăнакансем çак çула юсас тĕлĕшпе паха ĕçсем пурнăçланăшăн республика ертÿлĕхне тав тăваççĕ.
Çавăн пекех министр «Комсомольски-Елчĕк-Курнавăш» автоçула та, пурĕ 8,8 çухрăм, тĕпрен юсас ĕçе тишкернĕ. Хальхи вăхăтра çак автоçула тĕпрен юсассин проект документацине хатĕрленĕ, патшалăх енчен экспертиза та тунă. Район администрацийĕн пуçлăхĕ Николай Миллин ĕçсене пурнăçлама Чăваш Республикинчи çул-йĕр фондĕнчен пулăшу кирлине палăртнă.