02 июля 2016 г.
«Слава-картофелю» агрофирмăн пирĕн районти «АСК-Яльчики» ООО структура уйрăмĕнче пĕр харăсах пысăк строительство ĕçĕсене пуçарса янă. Пĕр сăмахпа, унчченхи «Мир» хуçалăхăн машинăпа трактор паркĕн территорийĕнче ĕç вĕресе тăрать.
Каçал тăрăхĕнчен килсе çитнĕ строительсен пĕр ушкăнĕ кунта икĕ çула яхăн каялла ÿссе ларнă, аякран сăнаса пăхсан пĕр-пĕр завода аса илтерекен çĕрулми упрамалли çĕнĕ ĕмĕрти çĕнĕ йышши пысăк хранилище территорине тирпей-илем кĕртессипе тимлет. Вĕсем 2000 ытла тăваткал метрпа танлашакан территорие бетон çул сарнă. Асăннă объектри кăткăс ĕçре строительсем 20 куна яхăн тăрăшнă. Бетонран сарнă çул, асфальтпа танлаштарсан, шанчăклă та. Вăл ытлашши ванса-çĕмĕрĕлменнине те строительсем çирĕплетсех калаççĕ.
- Территорие çĕнĕ йышши карта тытса çавăратпăр. Çак ĕçе те паян-ыранах тума ĕлкĕрмелле, - тет Юрий Галкин ĕç тăвакан директор. Кашни ĕçе вĕçе-вĕçĕн пурнăçланин сăлтавне те пĕлтĕмĕр: кăçалхи июлĕн 9-мĕшĕнче «АСК-Яльчики» ООО никĕсĕ çинче пысăк мероприяти - Уй кунĕ иртет. Çĕрулми туса илессинчи ĕç ăсталăхĕпе паллашма çак кун Кÿлпуç ялне хамăр республикăран анчах мар, Раççейĕн тĕрлĕ регионĕсенчен пурĕ 200-е яхăн çын килсе çитмелле.
...Вырăнти строительсен тепĕр ушкăнĕ тĕш тырă упрамалли склад тунă çĕрте тăрăшать. Çак пысăк калăпăшлă ĕçе те çак кунсенче вĕçлеме палăртнă. Григорий Яшинпа Анатолий Ловкин, Владимир Сазонов çулталăк тăршшĕпех тăван ялта ĕçлесе пурăнма май пулнăшăн тата кăмăла тивĕçтерекен ĕç укçи алла илнипе кăмăллă.
Склад оборудованийĕсене юсакан Александр Павловпа Андрей Гаврилов, Олег Иванов та ĕçпе хавхаланнă.
- Йăл кулăпа ĕçлетпĕр, - теççĕ вĕсем.
«АСК-Яльчики» ОООра кăçал анчах мĕн чухлĕ ĕç тума ĕлкĕрнĕ! Малашне ялхуçалăх культурисене шăварассине тата ытларах лаптăкра йĕркелес тĕллевпе 1900 метр чухлĕ шыв пăрăхĕ хывса хăварнă. 4,5 пин тонна çĕрулми шăнăçакан ултă секцие пайланă хранилищĕн пĕр секцине вăрлăхлăх çĕрулмине ăна кăларнă хыççăн сивĕтмелли оборудовани вырнаçтарасси те - çитес вăхăтрах пурнăçламалли тĕллев.
...15 çул каялла йĕркеленнĕ, умри йывăрлăхсене парăнмасăр çĕнĕлĕхсене алла илессипе пикенсе вăй хунин тивлетне пула ура çине çирĕп тăнă «Слава-картофелю» агрофирма хăйĕн ĕçченĕсен пурнăç условийĕсене лайăхлатма та сахал мар укçа-тенкĕ уйăрать. Иртнĕ кĕркунне Кÿлпуçĕнчи пĕвене çĕнĕрен тума анчах 1 миллион тенкĕ уйăрса панă. Ял çыннисем çакăншăн кăмăллă.
Светлана АРХИПОВА.
Сăнÿкерчĕкре: Александр Павлов, Андрей Гаврилов тата Олег Иванов