02 июля 2016 г.
Унчченхи «Мир» пĕрлешÿллĕ хуçалăх никĕсĕ çинче «АСК-Яльчики» ООО йĕркеленнĕренпе /унтанпа 8 çул çитнĕ/ Кÿлпуç тата Хăвăлçырма ялĕсенче пурăнакансем ĕçсĕр ларса курманпа пĕрех.
Хĕрарăмсемпе шкул ачисем валли те икĕ алла пĕр ĕç тăтăш тупăнсах пырать. Хальхи вăхăтра вĕсем, пурĕ 30 çынна яхăн, ушкăнпа йăрансем тăрăх утса вăрлăхлăх çĕрулми лаптăкĕсенчи япăх аталанакан, чирлĕ калчасене алă вĕççĕн /фитопрочистка/ ака çинчен тасатаççĕ. Ял çыннисем кашни кунхи ĕçе хавхалануллă кăмăл-туйăмпа хутшăнаççĕ. Мĕншĕн тесен вĕсем çак йывăрах та мар ĕçе хутшăнса кашни кун 400 тенкĕ укçа ĕçлесе илме пултараççĕ. Унсăр пуçне, кăнтăрлахи апата та хире пырсах тÿлевсĕр çитереççĕ.