02 июля 2016 г.
Чăваш Республикин айăплава пурнăçлакан управленин уголовнăй ĕçсем тăрăх йышăнусене пурнăçа кĕртнине тĕрĕслесе тăракан инспекцийĕн Елчĕк районĕнчи филиалĕн ĕçченĕсем судпа айăпланнисен пурнăçĕпе кăсăкланса, тĕрĕслесе тăраççĕ.
Кăçалхи 5 уйăхра икĕ хутчен «Условник» операци ирттернĕ, районти полици пайĕ йĕркелекеннисене те хутшăннă.
Ятарлă тĕрĕслевсем вăхăтĕнче айăпçăсен ĕç тата пурăнакан вырăнĕсенче пулса курнă. Ертÿçĕсемпе курнăçнă май айăпçăсен ĕç-хĕлĕпе, хăйсене мĕнле тытнипе кăсăкланнă. Пурăнакан вырăнĕсенче çывăх тăванĕсемпе пĕрле калаçусем ирттернĕ, обществăлла вырăнсенче хăйсене мĕнле тытнипе кăсăкланнă.
Çакăн евĕр тĕрĕслев ĕçĕсем туса ирттернин тĕллевĕ - судпа айăпланнисене тÿрĕ çул çине тăма май тупса парасси, çĕнĕрен преступлени çулĕ çине тăрассинчен асăрхаттарасси.
Шел пулин те, суд тата инспекци ĕçченĕсем хушнă явапсене пурнăçламан айăпçăсем те пур.
Тĕслĕхрен, Патреккел ялĕнчи А.Орлов пирки Елчĕк районĕн миравай судйи 3 уйăх ĕçлесе ĕç укçин 5 процентне тытса юлма йышăну кăларнăччĕ.
Анчах та А.Орлов йышăннă суд приговорĕпе килĕшесшĕн пулмарĕ - ытла та çăмăл наказани парса айăпланă, терĕ. Инспекцире шута илсенех ĕçлесе юсанмалли наказанине пурнăçламасси çинчен, хупса лартмалли йышăну кăларма, ĕçе çĕнĕрен суда ярса пама ыйтрĕ.
А.Орлов айăпçăна темиçе хутчен асăрхаттарнă пулсан та, «Прогресс» АХОра ĕçе пуçăнмарĕ. Елчĕк районĕнчи 1-мĕш номерлĕ суд участокĕн миравай судйи А.Орлов ĕçне пăхса хупса лартмалла йышăну кăларчĕ.
Çакăн пекех йышăнусене Тÿскел ялĕнчи И.Алюкин тата Шуршу ялĕнчи Р.Дергачев пирки те йышăннă.
Юлашки çулсенче Раççей Федерацийĕн саккунĕсемпе чылай айăплава ăнланса илсе тÿрĕ çул çине тăччăр тата килтех çемьепе пĕрле пурăнса преступлени çулĕ çине урăх ан тăччăр тесе тăрăшаççĕ.
Анчах та чылайăшĕ çакна ăнланасшăн мар - тÿрĕ çул çине тăмаççĕ, çăмăл тата ĕçлесе юсанмалли айăплавран пăрăнма, хăйсен ирĕкĕпех йĕплĕ пăралук леш енне кайма тăрăшаççĕ.
Инспекцире шутра тăракансенчен чылайăшĕ судпа айăпланнă хыççăн йăнăшĕсене ăнланса илсе тÿрĕ çул çине тăраççĕ. Сăнав вăхăтĕнче суд хушнă йĕркене пĕрре те пăсманнисем те пур.
Кăçалхи 5 уйăхра хăйсене йĕркеллĕ тытнă 3 çамрăка условнăй айăплавран вăхăт çитичченех хăтарнă.
Т.СЕМЕНОВА,
инспекци ертÿçи.