02 июля 2016 г.
.jpg "ЧР Пуçлăхĕн стипендиачĕ")
Кĕçĕн Таяпари пĕтĕмĕшле пĕлÿ паракан тĕп шкулти тăххăрмĕш класран вĕренсе тухнă Татьяна Изосимова кăçал Чăваш Республикин Пуçлăхĕн стипендине илме тивĕç пулнă.
Надежда Александровнăпа Алексей Геннадьевичăн кĕçĕн хĕрĕ Таня мĕн пĕчĕкрен кĕнеке вулама юратать. Аппăшĕпе пиччĕшĕнчен нихăш енĕпе те юласшăн мар вăл. Вĕсем пекех шкулта тăрăшса вĕренет. Вĕренÿ отличникĕ районти олимпиадăсене, тĕрлĕ конкурссене хутшăнать. Кăçал кăна-ха вăл хăйне тăхăр предметпа тĕрĕсленĕ.
Таня шкулта иртекен мероприятисене те ертсе пырать. Артист пек янăравлă та шухăшлăн вулать вăл сăвăсемпе калавсене. Ахальтен мар республикăри «Чĕрĕ классика» конкурсра «Илемлĕ вулакан» ята çĕнсе илнĕ. Ольга Ырзем ячĕллĕ конкурс лауреачĕ те.
Спортран та пăрăнмасть хастар хĕрача. Уйрăмах çăмăл атлетикăна кăмăллать. Çавăн пекех теннисла выляма ухата. Кире пуканĕ те уншăн ют мар.
Таньăн ĕмĕчĕсем çунатлă. Вуннăмĕш класа вăл Елчĕк шкулне каясшăн. Вăтам пĕлÿ илнĕ хыççăн пиччĕшĕ пекех врача вĕренесшĕн.