29 июня 2016 г.
Элĕк районĕ Шупашкар хулипе тан 2016 çулта Республика кунне ирттермелли тĕп вырăн пулса тăнă.
Кил хуçисем уява ирттерме тĕплĕн хатĕрленнĕ. Кунта килсе çитнĕ хăнасем уйрăмах район центрĕ çĕнелсе улшăннипе кăмăллă пулнă. Район центрĕнчи Октябрь, Пушкин урамĕсене, ярмăрккă иртекен вырăна асфальт сарнă, уçă пĕлĕт айĕнче парк-музей çĕкленĕ, Совет Союзĕн Геройĕ М.Е.Ефимов ячĕпе хисепленекен лапама çĕнĕ сăн, салари кÿлĕсене йĕркене кĕртнĕ.
Элĕк район çыннисене тата килнĕ хăнасене Чăваш Ен Пуçлăхĕ Михаил Игнатьев, унăн мăшăрĕ Лариса Юрьевна, Раççей Федерацийĕн Федераци Пухăвĕн Федераци Канашĕн членĕ Вадим Николаев, ЧР Патшалăх Канашĕн Председателĕн заместителĕ, «Единая Россия» партин Чăваш регион уйрăмĕн секретарĕ Николай Малов, Чăваш Республикин Министрсен Кабинечĕн Председателĕн заместителĕ - Чăваш Республикин Пуçлăхĕн Администраци ертÿçи Юрий Васильев, сывлăх сыхлавĕн министрĕ Алла Самойлова, культура, национальноçсен ĕçĕсен тата архив ĕçĕн министрĕн ĕçĕсене пурнăçласа пыракан Константин Яковлев тата ытти официаллă çынсем саламланă.
Республика Пуçлăхĕ Йăлкăш ялĕнче фельдшерпа акушер пункчĕн çĕнĕ çуртне уçнă çĕре хутшăннă.
Республика ертÿлĕхĕ 4 çул каялла Чăваш Республикинче çĕнĕ йышши 100 ФАП туса лартма йышăнни ăнăçлă пурнăçа кĕнĕ. Халăх ыйтăвне туллин тивĕçтерес тĕллевпе çакăн йышши сывлăх сыхлавĕн учрежденийĕсене 2017 çулччен тата 50 туса лартма йышăннă. Вĕсенчен пĕрремĕшĕ шăпах кунти Йăлкăш ялĕнче пурăнакансене савăнтарнă.
...Республика кунне Элĕк салинче чаплăн уявлама пирĕн район делегацийĕ те, район администрацийĕн пуçлăхĕ Николай Миллин ертсе пынипе, хутшăннă.
Унсăр пуçне, Елчĕксем «XXI ĕмĕрти Кулибин» куравра тата ача-пăча пултарулăхĕн «Модельсен тĕнчи» конкурс фестивалĕнче хăйсен пултарулăхĕпе паллаштарнă. Тăрăмри Владимир Егоров «XXI ĕмĕрти Кулибин» куравра хăй тĕллĕн ăсталанă трактора кăтартнă пулсан, Елчĕкри пĕтĕмĕшле пĕлÿ паракан вăтам шкулти Алексей Данилов вĕрентекен ертсе пынипе районти 4 шкулта /Елчĕкре, Аслă Елчĕкре, Кушкăра тата Лаш Таяпара/ вĕренекен çамрăк ăстаçăсем робот техникипе паллаштарнă. Куракансем вĕсен ĕçĕсене тивĕçлĕ хак панă.
Ĕç çыннин çулталăкне халалласа йĕркеленĕ Элĕк районĕнчи 12 ял тăрăхĕнчи харпăр хăй хуçалăхĕн этнохуçалăхĕпе те хăнасем кăсăкланса паллашнă.