29 июня 2016 г.
Июнĕн 23-24-мĕшĕсенче Шупашкарта «Регионсем: экономика ÿсĕмĕн çĕнĕ çăлкуçĕсем» IX экономика форумĕ ĕçлерĕ.
Унта федерацин тата регионсен влаçĕсен органĕсен, пĕтĕм тĕнчери финанс тата инвестици тытăмĕсен представителĕсем, бизнесменсем, Раççейри тата ют çĕршывсенчи общество деятелĕсем хутшăннă. IX экономика форумĕнче пирĕн район делегацийĕ те пулнă - ăна район администрацийĕн пуçлăхĕ Николай Миллин ертсе пынă.
Чăваш патшалăх оперăпа балет театрĕнче иртнĕ пленарлă ларура Чăваш Республикин Пуçлăхĕ Михаил Игнатьев тухса калаçнă. Вăл Чăваш Ен Раççейри регионсем хушшинчи инвестици илĕртÿлĕхĕн рейтингĕнче 9-мĕш вырăнтан 6-мĕш вырăна хăпарнине, çак кăтартушăн мăнаçланнине, пуласлăхра ăçта тата камсем патне талпăнмаллине пĕлнине, çынсен, çав шутран çамрăксен, чун-чĕринче тухăçлă ĕçлеме хистекен хăват пуррине палăртнă.
Чăваш Ен Пуçлăхĕ пирĕн çынсем, этем капиталĕ, ăс-хакăлĕ тĕп пуянлăх, çынсене инвестици хывасси - тĕрлĕ влаçсен тĕллевĕ пулни çинчен чарăнса тăнă, хăнасене республикăн социаллă пурнăçĕпе экономикăри ырă улшăнусемпе паллаштарнă.
Экономика форумĕнче ытти тĕрлĕ мероприяти те иртнĕ. Раççей промышленникĕсемпе предпринимателĕсен федерацин Атăлçи округĕнчи уйрăмсен координаци канашĕн ларăвĕнче, тĕрлĕ темăпа иртнĕ «çавра сĕтелсенче», семинар-канашлусенче экономикăна аталантармалли малашлăх çул-йĕрĕсене палăртнă. Çавăн пекех Чăваш Ен Министрсен Кабинечĕпе «Пĕрлештернĕ судостроени компанийĕ» АО хушшинче пĕрле çыхăнса ĕçлемелли килĕшĕве алă пуснă.
Район администрацийĕн пуçлăхĕн çумĕ - финанс пайĕн ертÿçи Галина Анисимова:
«Экономика форумĕнче Чăваш Республикин Пуçлăхĕ Михаил Игнатьев Чăваш Енĕн ырă улшăнăвĕсем çинчен чарăнса тăнă май, пирĕн республика ĕçлĕ партнер пулса тăнине палăртрĕ. Ахальтен мар ĕнтĕ Чăваш Енре туса кăларнă таварсене 85 патшалăх туянать, республикăра Испани, Германи, Серби, Япони компанийĕсем ĕçлеççĕ.
Дискуссинче тухса калаçакансем, экспертсем IX экономика форумĕ регионсем, экспертсем пĕр-пĕрин паха опычĕсемпе паллашмалли, пĕчĕк тата вăтам бизнеса аталантармалли çул-йĕре палăртмалли, регионсен социаллă пурнăçĕпе экономикине çĕклемелли принципсене пурнăçа кĕртмелли, кредитсене çăмăлрах илмелли майсем туса памалли тĕп площадка пулса тăнине палăртрĕç.
Чăваш Ен çĕнĕ шухăшсене палăртмалли, вĕсене пурнăçа кĕртмелли вырăн пулса тăнине чăннипех чунпа туйрăм».