29 июня 2016 г.
Кăçал районти вăтам шкулсенчен 147 выпускник пурнăçăн анлă çулĕ çине тухнă.
Выпускниксен балĕ... Çак уява нихăш календарьте те паллă туман, çапах та вăл çынсен чĕринче яланах тарăн йĕр хăварать. Çак кун Курнавăшри пĕтĕмĕшле пĕлÿ паракан вăтам шкулпа 17 выпускник сывпуллашрĕ, алла аттестат илчĕ. Икĕ выпускник - Лариса Назаровăпа Александр Кириллов палăртуллă аттестатпа пĕрле «Вĕренÿри паха çитĕнÿсемшĕн» медале тивĕçрĕç. Çавăн пекех вĕренÿре, общество ĕçĕнче, спортра палăрнăшăн Владимир Корнилова район администрацийĕн, Лариса Назаровăпа Александр Кириллова райадминистрацин вĕренÿпе çамрăксен политикин пайĕн Хисеп грамотисене пачĕç.
Выпускниксене шкул директорĕ Петр Кузнецов, Курнавăш ял тăрăхĕн пуçлăхĕ Юрий Смирнов, педагогика ветеранĕ Сергей Николаев, пĕрремĕш вĕрентекенсем Галина Кругловăпа Венера Максимова, класс ертÿçи Елена Светопольская, ашшĕ-амăшĕ ячĕпе Людмила Шаурбина саламласа ăнăçу сунчĕç. Александра Романова, Анита Козлова, Алиса Лисицына, Юлия Каргина, Татьяна Мясникова, Ирина Светопольская, Татьяна Курчина, Сергей Назаров савăк юрă-ташăпа савăнтарчĕç.
Июнĕн 23-мĕшĕнче ытти шкулсенче те выпускниксен каçĕсем иртрĕç. Вĕсенче кăçал шкул пĕтерекенсене вĕрентекенсем, ашшĕ-амăшĕ, хăнасем саламларĕç.