25 июня 2016 г.
Аслă Шăхаль ялĕнче çуралса ÿснĕ, халĕ Шупашкарта пурăнакан Вячеслав Александрович Павлов çак кунсенче хăйĕн юбилейне паллă тăвать.
50 çул каялла, 1966 çулхи июнĕн 28-мĕшĕнче çут тĕнчене килнĕ Вячеслав Александрович. Мĕн ачаранах пултарулăхĕпе, ăсталăхĕпе палăрса тăнă. 1973-1983 çулсенче Çĕнĕ Пăвари вăтам шкулта вĕреннĕ чухне тĕрĕс ăслăлăхсене - математикăпа физикăна, астрономине, химине килĕштернĕ. Вĕсемпе ирттерекен тĕрлĕ шайри олимпиадăсене хутшăннă, призерсен йышне кĕнĕ. Тĕрĕс ăслăлăхсене юратни, класс ертÿçине - математика учительне Елена Ивановна Федотовăна хисеплени унăн малашнехи пурнăç çул-йĕрне палăртнă. Шкул пĕтерсен И.Я.Яковлев ячĕллĕ Чăваш патшалăх педагогика институтне /халĕ университет/ çул тытать, физикăпа математика факультетĕнче ăс пухать. Пĕрремĕш курс пĕтернĕ çамрăк каччă Совет Çарĕнче салтак тивĕçĕсене пурнăçлама тытăнать. Кунта та хăйĕн пултарулăхĕпе палăрнă. В.Павлов сержанта стратегиллĕ ракетăсен çарĕсен отделени командирĕ пулма çирĕплетнĕ. Икĕ çул çар тивĕçĕсене пурнăçланă хыççăн вĕренĕве малалла тăсать. Институтра вĕреннĕ вăхăтра ушкăн старости, институтри дружинниксен отрячĕн командирĕ пулнă.
Çамрăклах ĕçе хăнăхнă. Шкулта вĕреннĕ тапхăрта çуллахи каникулсенче яланах колхозра тăрăшнă, ашшĕ-амăшне пулăшнă, лаша кÿлсе хуçалăх уй-хирне тухнă. Уйрăмах техникăна килĕштернĕ В.Павлов. Мотоциклпа, тракторпа çÿреме кăмăлланă. Шкулта аслă классенче вĕреннĕ чухне тĕш тырă çапса тĕшĕлекен комбайнăн комбайнер пулăшуçи пулнă.
Кирек хăш ĕç патне те алли пынăран, педагогика институтĕнче вĕреннĕ чухне студентсен строительство отрячĕн йышĕнче 4 çул тăрăшнă, вĕсенчен 2 çулне отряда ертсе пынă.
Институтра пĕлÿ пухнă тапхăрта çак факультетрах ăс пухакан хитре хĕрпе, пулас мăшăрĕпе - Надеждăпа паллашнă, çемье çавăрнă.
Пултаруллă яш-каччăна факультет ертÿçисем асăрханă, В.Павлова институтра ĕçлеме сĕннĕ. 1991-1993 çулсенче математика анализĕн кафедринче преподавательте ĕçленĕ.
Пурнăç малалла шунă, 1993 çулта пултаруллă çамрăк Чăваш Республикин Шалти ĕçсен министерствине куçать. Инспектортан пуçласа кадрсен управленийĕн начальникĕн çумĕ - воспитани ĕçĕн пайĕн начальникĕ таран ÿснĕ. В.Павлов 2000-2005 çулсенче Шупашкар хулин Калинин районĕнчи шалти ĕçсен пайĕн начальникĕн çумĕн тивĕçĕсене пурнăçланă. 2010 çулта шалти ĕçсен службин полковникĕ отставкăна тухать, унтан Россельхозбанкăн хăрушсăрлăх службинче, 2011 çулхи май уйăхĕнчен Шупашкарти агрегат заводĕнче экономика хăрушсăрлăхĕн директорĕ пулса ĕçлет.
Вячеслав Александрович пĕтĕм çĕрте пултарулăхĕпе палăрнă. Ахальтен мар ĕнтĕ Шалти ĕçсен министерствинче службăра пулнă чухне В.Павлова Раççей Федерацийĕн тата Чăваш Республикин Шалти ĕçсен министерствисен Хисеп грамотисемпе, патшалăхăн 4 наградипе чысланă. Милицин отличникĕ 2001 çулта Чечен Республикинче служба командировкинче пулнă.
Мăшăрĕпе, Надежда Геннадьевнăпа, сăмах май, вăл та Шалти ĕçсен министерствинче ĕçлет, 2 ывăл çитĕнтернĕ. Асли, Сергей, Чăваш патшалăх педагогика университечĕн физикăпа математика факультетне пĕтернĕ. Инженер-программист. Кĕçĕнни, Александр, педагогика университечĕн студенчĕ.
Çак кунсенче хисеплĕ Вячеслав Павлов 50 çул тултарать. Юбилей ячĕпе саламласа çирĕп сывлăх, ăнăçу сунатпăр.
Л.КУЗНЕЦОВ.