25 июня 2016 г.
.jpg "Пултаруллă хĕр")
Çĕр çинче интереслĕ профессисем нумай, анчах та романтикăлла профессисенчен пĕри, ман шутпа, стюардесса ĕçĕ. Шăпах çак профессине алла илнĕ те ĕнтĕ Кĕçĕн Таяпа ялĕнче çуралса ÿснĕ Вера Калинина. Вĕренÿ çулĕ вĕçĕнче, акăлчан чĕлхин эрнелĕхĕ иртнĕ май, Верăна тăван шкула тĕлпулăва чĕнтĕмĕр.
Шкулта вĕреннĕ чухнех вăл хастарлăхпа, ĕçченлĕхпе тата тăрăшулăхпа палăрса тăратчĕ. Пĕрремĕш класранпах «5» паллăпа çеç ĕлкĕрсе пынă, олимпиадăсене хутшăнса призерсен йышне пĕрре мар кĕнĕ. Вăтам шкула вăл кĕмĕл медальпе пĕтернĕ. Шкулта тата район шайĕнче иртекен мероприятисене /КВНсем, концертсем/, спорт ăмăртăвĕсене те хутшăнма вăхăт тупнă вăл. Уйрăмах шашка, шахмат, кире пуканĕ, футбол, волейбол вăййисене кăмăлланă. Алă вăй виçессипе вара вăл спорт мастерĕн кандидачĕ пулса тăнă, пĕрре çеç мар республика шайĕнчи ăмăртусенче çĕнтернĕ. Вăтам шкул пĕтернĕ хыççăн Вера Шупашкарти аслă вĕренÿ заведенийĕнче /МГОУ/ экономист специальноçне алла илет. Кунта та хăйĕн пултарулăхĕпе палăрса тăрать Кĕçĕн Таяпа хĕрĕ: лайăх вĕренет, наукăпа практика конференцийĕсене /çав шутран акăлчан чĕлхипе те/ хутшăнать, спорт ăмăртăвĕсенчен те пăрăнса юлмасть. Ахальтен мар ĕнтĕ ăна икĕ хутчен те Чăваш Республикин Президенчĕн стипендипе чыслаççĕ.
Анчах та экономист дипломĕ çеç тивĕçтермест Верăна. Вăл хăй шкултах кăмăлланă акăлчан чĕлхине малалла вĕренме шухăш тытать. Çав тĕллевпех вăл Чăваш патшалăх университетне ют чĕлхесен факультетне вĕренме кĕрет. Çапла майпа Вера икĕ аслă вĕренÿ заведенине те хĕрлĕ дипломпа пĕтерет. Халĕ ĕнтĕ ют чĕлхе пулăшнипе ун умĕнче тĕрлĕ енлĕ чĕнекен çулсем уçăлаççĕ.
Çул çÿреме ĕмĕтленекен хĕр чи малтанах Финляндине кайса курать, кайран Германире 4 уйăх ĕçлет, унти тĕрлĕ хуласене çитсе курать. Унтан таврăнсан вара Верăн тĕрлĕ çĕршывсене çитсе курас туртăм тата вăйланать: Мускава стюардесса пулса ĕçлеме кайма шутлать. Пысăк конкурс витĕр тухать вăл. Чи малтанах акăлчан чĕлхипе пĕлĕве тĕрĕслеççĕ иккен. Çавăн пекех сывлăх, кĕлеткепе сăн-пит илемĕ, çынпа калаçу йĕркелеме, тĕрлĕ йывăр лару-тăруран тухма пĕлни те питĕ кирлĕ. Çак конкурссем витĕр ăнăçлă тухнă Вера, Раççейĕн «Аэрофлот» авиакомпанийĕн стюардесси пулса тăнă. Унтанпа ĕнтĕ 2 çул иртнĕ. Пĕрре те ÿкĕнмест Вера çак профессие суйласа илнишĕн. Миçе тĕрлĕ çĕршыва çитсе курман-ши вăл халĕ: Китай, Корея, Вьетнам, Итали, Англи çĕршывĕсем, Куба утравĕ. Халĕ вара Америкăна вĕçме хатĕрленет иккен. Унсăр пуçне Раççейĕн инçетри хулисенче те пулса курнă: Хабаровск, Южно-Сахалинск, Иркутск тата ытти те. «Малтанах самолетпа вĕçме кăштах шиклентеретчĕ, халĕ вара хăнăхрăм, автобуспа çÿренĕ пекех туйăнать», - тет Вера.
Тем тĕрлĕ ыйту та пачĕç Верăна, акăлчанла ыйтусем парса та тĕлĕнтерчĕç.
Питĕ интереслĕ те асра юлмалла иртрĕ çак тĕлпулу. Асăнмалăх пĕчĕк парне те илсе килнĕ Вера: «Аэрофлот» логотиплă ручкăсем кашни вĕрентекенпе шкул ачине тивĕçрĕç. Тĕлпулу вĕçĕнче вăл ачасене тăрăшса вĕренме, палăртнă тĕллев патне хăрамасăр утма канаш пачĕ. Çавăн пекех вăл хальхи XXI ĕмĕрте ют чĕлхесене, уйрăмах акăлчан чĕлхине, пĕлни питĕ кирлине, вĕсене лайăх пĕлни пурнăçа ăнăçлă йĕркелеме пулăшнине палăртса хăварчĕ, вĕрентекенсене, уйрăмах ют чĕлхесен вĕрентекенне А.А.Скворцовăна, тав турĕ.
А.СКВОРЦОВА,
класс ертÿçи, акăлчан чĕлхин вĕрентекенĕ.