25 июня 2016 г.
2015 çулхи июнĕн 25-мĕшĕнче Раççейри статистиксем пĕрремĕш хут хăйсен професси уявне - Статистика ĕçченĕн кунне паллă тунă.
Çак куна ахальтен суйласа илмен. Раççей патшалăх статистикин историйĕ 1811 çулхи июнĕн 25-мĕшĕнчен пуçланать. Шăпах çав кун Пĕрремĕш Александр император Полици министерствине çирĕплетнĕ, унăн тытăмĕнче ятарлă подразделени - статистика уйрăмĕ йĕркеленĕ. Ăна Раççей историкĕ тата экономисчĕ Карл Федорович Герман /1767-1838/ ертсе пынă. Çав вăхăтран асăннă тытăм патшалăх статусне илнĕ тата унăн управленине информаципе тивĕçтернин пĕлтерĕшне çирĕплетсе панă.
Федерацин патшалăх статистика служби ĕç-хĕле хăйĕн тытăмĕ тата территори органĕсем урлă пурнăçлать. Хальхи вăхăтра Чăваш Республикинче патшалăх статистикин функцине Чăвашстат пурнăçлать. Ăна 1920 çулта йĕркеленĕ - çав кун Чăваш Автономи облаçĕн ревкомĕ хăйĕн тытăмĕ çумĕнче унăн облаçри бюровне туса хума йышăннă. Чăвашстат пĕлтерĕшлĕ статистика мероприятийĕсене - çыравсемпе тишкерÿсене ирттерме хастар хутшăнать. Кăçалхи июлĕн 1-мĕшĕнчен пуçласа августăн 15-мĕшĕччен Пĕтĕм Раççейри ялхуçалăх çыравĕ иртет, вăл - Раççейĕн çĕнĕ историйĕнчи иккĕмĕш çырав. Ăна аграри секторĕнчи лару-тăрăва тĕрĕс тата кирлĕ пек хаклас тĕллевпе ирттереççĕ.
Юлашки вунă çулта Раççей статистикинче палăрмаллах пысăк улшăнусем пулса иртнĕ, вăл çĕнĕлле ĕçлеме тытăннă, тухăçлăхне ÿстернĕ, хăйĕн пулăшăвĕпе усă куракансемшĕн çывăхланнă. Унăн аталанăвне тĕнчери çĕршывсен наци службисемпе çыхăнса ĕçлени ырă витĕм кÿнĕ.
2012 çултанпа Федерацин патшалăх статистика службин ĕç-хĕлне Раççей Федерацийĕн Правительстви ертсе пырать. Халĕ Росстата официаллă статистика учечĕн тытăмĕнче патшалăх политикине туса хатĕрлес тата нормăпа право тĕлĕшĕнчен йĕркелесе тăрас енĕпе полномочи панă. Статистика ĕçченĕн кунне çирĕплетес ыйтăва пурнăç хăй кăларса тăратнă.