22 июня 2016 г.
Елчĕк район сучĕ Кĕçĕн Таяпа ял тăрăхĕнче тавралăха сыхлас енĕпе мĕнле ĕçленĕ пирки гражданла ĕçе тишкернĕ.
Район прокурорĕ Елчĕк район судне Кĕçĕн Таяпа ял тăрăхĕнчи ялсенче тирпейсĕрлĕх хуçаланнине, кунта çутçанталăк сыхлавĕн тата санитари саккунĕсене пăхăнманнине тишкерсе хак памалли пирки тавăçпа тухнă.
Прокуратура ĕçченĕсем май уйăхĕн 13-мĕшĕнче ирттернĕ тĕрĕслевре саккуна пăсса йĕркеленĕ свалкăсене тупса палăртнă. Акă, Таяпа Энтри ялĕнче «Фея» лавкка хыçĕнче, трактор паркĕ, водобашня патĕнче, Магазин урамĕ патĕнче вырнаçнă çăлкуç умĕнче, Кĕçĕн Таяпара овощехранилище пулнă вырăнта, Сад урамĕнче, шкул çурчĕ хыçĕнчи çырмара хут, пластмассăран тата кĕленчерен хатĕрленĕ бутылкăсем, тимĕрпе шифер тата йăлари ытти каяшсем пухăнса кайнине тупнă. Анчах Кĕçĕн Таяпа ял тăрăхĕн администрацийĕ хăйĕн тивĕçĕсене туллин пурнăçламасть - йăлари каяшсене пухас тата тиесе тухассине тивĕçлипе йĕркелемен. Саккуна пăсса йĕркеленĕ свалкăсем вара тăван тавралăхшăн, сывлăхшăн сиен кăларса тăратаççĕ, çутçанталăк сыхлавĕн тата санитари саккунĕсене пăснине палăртакан пулăм пулса тăраççĕ. Çавăн пекех Кĕçĕн Таяпа ял тăрăхĕн уставĕнче йăлари каяшсемпе ытти тасамарлăха пухас енĕпе ял тăрăхĕн администрацийĕн тивĕçĕсенчен пĕри тесе палăртнă. Анчах çак тивĕçе администраци кирлĕ пек пурнăçласа пымасть.
Елчĕк район сучĕ Кĕçĕн Таяпа ял тăрăхĕн администрацине асăннă çитменлĕхсене пĕтерме, йăлари каяшсене тата ытти тасамарлăха суд йышăнăвĕ саккунлă вăя кĕнĕренпе 2 уйăх тăршшĕнче пухса тиесе тухма, тасатма хушнă.
Г.ЧЕРНОВА,
район сучĕн председателĕн пулăшуçи.