18 июня 2016 г.
Çак кунсенче çывăх çыннисем, ĕçтешĕсем, пĕлĕшĕсем Аслă Таяпа ялĕнче çуралса ÿснĕ Нина Петровна /Краснова/ Фроловăна ăшă сăмахсемпе, асăнмалăх парнесем парса хавхалантараççĕ. Çавăнпах, тен, нихçанхинчен илĕртÿллĕрех вăл. Ытти чухне те унăн сăн-питĕнче яланах йăл кулă çиçет, çапла майпа вăл ытти çынсене те хăйĕн ăшшине парнелет. Чун ыйтнипе пурнăçлакан юратнă ĕç ăна, пушшех, илем кÿрет.
Пĕчĕкрен учитель пулма ĕмĕтленнĕ хĕрача çиччĕмĕш класра вĕреннĕ чухне Елчĕкри тĕп больницăра сипленекен тăванĕ патне килсен хăйĕн шухăшне самантрах тĕпрен улăштарнă. Шурă халатлă медицина сестри уншăн юмахри асамçă евĕр туйăннă. Ашшĕпе амăшĕ те ăна каласа итлеттереймен. Мĕншĕн тесен вĕсем ăна çуралсанах ялти шкулта ĕçлекен Нина Петровна учительницăна сума суса унăн ятне панă, хĕрĕ те ÿссе çитсен учительница пуласса шанса тăнă. Çамрăк хĕр Канашри медицина училищине вĕренме кĕнĕ. Алла диплом илсен тăван ене таврăнать.
Елчĕкри тĕп больницăра сиплев ĕçĕнче пысăк ăсталăх пухнă специалистсем сахаллăн мар. Вĕсенчен пĕри Нина Фролова массажист-сестра. Унăн пĕтĕмĕшле ĕç стажĕ 42 çул ытла, çав шутран 28 çул массажистка пулса тăрăшать. Нина Петровна - хăйĕн ĕçĕнчи чăн ăста, аслă квалификаци категорине тивĕçнĕ. Районта пурăнакансене тĕрлĕ чир-чĕртен массаж туса сыватнисĕр пуçне вăл профилактика ĕçне те туса пырать. Массаж сывлăхшăн усăллă пулни, ку енĕпе авалхи Китайран килнĕ сĕнÿсем паян та хăйĕн пĕлтерĕшне çухатманни, мĕн ачаран пуçласа ватăличченех шăм-шак хусканăвĕсем пысăк пĕлтерĕшлĕ пулни çинчен ăнлантарса парать. Пациентсем те, ĕçтешĕсем те ăна ĕçе яваплăха пурнăçланăшăн, кирек хăçан та пулăшма тăрăшнăшăн хисеплеççĕ.
Нина Петровна - ĕç ветеранĕ, РФ хисеплĕ донорĕ, пархатарлă ĕçĕшĕн Чăваш Республикин Сывлăх сыхлавĕн министерствин Хисеп грамотине тата ытти грамотăсене, Тав хучĕсене илме тивĕçлĕ пулнă.
Пурнăç тилхепине çирĕп тытса пыракан çак сăпайлă та ĕçчен хĕрарăмра мĕн чухлĕ вăй-хăват, чăтăмлăх! Мĕн кăна тума пĕлмест вăл: çыхать, тĕрлет, çĕвĕ çĕлет, картина ÿкерет, юрă-кĕвĕ ăсти, кирлĕ пулсан, килти техникăна та хăех юсама пултарать. Ура çинче хăй тĕллĕн çирĕп тăракан хăюллă çынна ыранхи кун та хăратмасть.
Нина Петровна юратнă анне, ăшпиллĕ асанне. Хăйĕн чĕрин пĕтĕм ăшшине икĕ ывăлĕпе мăнукĕсене парать, унăн 6 мăнук. Тăван кил-çурт вучахне, унти çемье ăшшине сÿнме памасăр йывăр тиеве хăйĕн ачаш хулпуççийĕ çине илнĕ хунямăшне кинĕсем те хисеплеççĕ, çамрăксем кирлĕ вăхăтра унран канаш-сĕнÿ ыйтаççĕ.
Л.ЗАЙЦЕВА.