11 июня 2016 г.
Раççей кунĕ - Раççей Федерацийĕн наци уявĕ. Ăна 1992 çултанпа РСФСР патшалăх суверенитечĕ çинчен Деклараци йышăннă кун паллă тăваççĕ. 2002 çултанпа - Раççей кунĕ.
1994 çулта Раççейĕн пĕрремĕш президенчĕ Борис Ельцин хăйĕн указĕпе июнĕн 12-мĕшне патшалăхăн пĕлтерĕшлĕ уявĕ - Раççей Федерацийĕн патшалăх суверенитечĕ çинчен Деклараци йышăннă кун тесе пĕлтернĕ. РСФСР халăх депутачĕсен 1990 çулхи июнĕн 12-мĕшĕнче иртнĕ пĕрремĕш съездĕнче РСФСР патшалăх суверенитетне туса хурасси çинчен Деклараци йышăннă. Çак вăхăтра Совет Союзĕн чылай республики хăйсем пăхăнманлăхĕ çинчен пĕлтернĕ - аслă çĕршыв саланма пуçланă. Каярахпа июнĕн 12-мĕшне Никама пăхăнманлăх кунĕ теме пуçланă. Сăмах май, çак кун пирĕн Раççей халăхĕ пĕрремĕш президента суйланă.
Раççей кунĕ - пирĕн çĕршывăн чи çамрăк уявĕ, Раççей Федерацийĕн çĕнĕ историйĕн пĕр пайĕ. Çак уяв çĕршывăмăрăн çĕнĕ историне кĕрсе юлнă паллă дата çеç мар, пĕр тан праваллă тата Конституци никĕсĕ çинче федераци мелĕпе йĕркеленнĕ Раççей патшалăхĕ çĕнелсе вăй илнĕ тапхăр пуçламăшĕ те.
Раççей кунĕ пĕтĕм çынсен саккун тата тĕрĕслĕх никĕсĕ çинче йĕркеленнĕ ирĕклĕхĕн, гражданла тăнăçлăхăн, килĕшÿлĕхĕн уявĕ те. Çак уяв нацисене пĕрлештерекен тата çĕршывшăн яваплăха палăртакан символ та.