11 июня 2016 г.
Июнĕн 9-мĕшĕнче Совет Çарĕсен Германири ушкăнĕнче службăра тăнă ветерансем район центрĕнче митинг ирттерчĕç.
Тĕнчери тăнăçлăха, мире тытса тăрассинче питĕ пысăк вырăн йышăннă Совет Çарĕсен Германири ушкăнĕ. 1945-1994 çулсенче унăн йышĕнче пирĕн район çамрăкĕсем те сахал мар пулнă. 2014 çулхи июль уйăхĕнче Германи çĕрĕ çинче çар службине ирттернĕ районти салтаксем пĕрлешме тĕв тытнă, ГСОВГ-ГСВГ-ЗГВ ветерансен районти уйрăмне йĕркеленĕ. Ăна Н.Павлов ертсе пырать. Иртнĕ çул Совет Çарĕсен Германири ушкăнĕн ветеранĕсем Елчĕкре çак паллă пулăма палăртса ятарлă стела йĕркелеме пултарчĕç. Çакăнта иртрĕ те тĕрлĕ çулсенче Германи çĕрĕ çинче çар службинче пулнă ветерансен тĕлпулăвĕ.
Район администрацийĕн пуçлăхĕ Н.Миллин ветерансене саламланă май çамрăксене патриотла воспитани парассинче палăрнă П.Кузнецова район администрацийĕн Тав çырăвне парса чысларĕ, воин-ветерансен активлăхне палăртрĕ, ăнăçу сунчĕ.
Сахал мар саламсем пулчĕç митингра. ГСОВГ-ГСВГ-ЗГВ ветеранĕсем, район администрацийĕн пуçлăхĕн пĕрремĕш çумĕ Л.Левый, Н.Павлов, ветерансен районти канашĕн ертÿçи С.Терентьева, Елчĕк ял тăрăхĕн пуçлăхĕ Ю.Блинов, Тутарстанри Пăва районĕнчен килнĕ Ф.Сабирзянов воин-ветерансем çамрăксемшĕн ырă тĕслĕх пулса тăнине палăртрĕç. Хальхи вăхăтра ГСОВГ-ГСВГ-ЗГВ ветеранĕсен районти уйрăмĕнче 170 çын учетра тăрать, 120-шĕ çакна ĕнентерекен удостоверенине алла илме ĕлкĕрнĕ, çак ĕç малалла пырать. Ветерансем тĕрлĕ çулсенче çар службинче Германире пулнă. Чи аслисем - З.Дружинин, К.Васильев, Н.Никифоров, Г.Туманов, Г.Рыбкин, В.Мешков тата ытти вун-вун ветеран паянхи кун та общество пурнăçĕнче активлăхпа палăрса тăраççĕ. Ахальтен мар митингра вĕсенчен чылайăшĕ тĕрлĕ наградăсене тивĕçрĕ. В.Николаев, С.Николаев, Н.Петухов асăну медалĕсене, Елчĕкри В.Николаевпа Лаш Таяпари В.Николаев, А.Анисимов, Ю.Васильев, В.Петров, Н.Никифоров, В.Анисимов тĕрлĕ шайри грамотăсене алла илчĕç.
ГСОВГ-ГСВГ-ЗГВ ветеранĕсен ячĕпе В.Анисимов пухăннисене тав сăмахĕ каларĕ.
Митинга хутшăннисем пурнăçран уйрăлнă воин-ветерансене асăнса пĕр минут шăп тăчĕç, стела умне чечек çыххисем хучĕç.
Воин-ветерансене «Кумсем» ушкăн ташă-юрăпа саламларĕ.
А.КАРЛИН.
Сăнÿкерчĕкре: ветеран-воинсен ушкăнĕ.