08 июня 2016 г.
Тунтикун район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Чăваш Республикин Финанс министерстви республикăри муниципаллă пĕрлешÿсем 2015 çулта уйăрса панă укçа-тенкĕпе мĕнле усă курнин пахалăхне хак панă. Унта çак ĕçе мĕнле планланине, укçа-тенкĕпе пĕр тикĕс усă курнине, укçа-тенкĕпе усă курнин уççăнлăхне, отчетсене вăхăтра тăратнине тата ытти енсене шута илнĕ. Укçа-тенкĕпе усă курнин пахалăхне çапла хак панă: чи пысăк пахалăхпа усă курни, тивĕçлипе тата тивĕçлипе мар. Елчĕк районĕ уйăрнă укçа-тенке чи пысăк пахалăхпа усă курнă 5 район йышне кĕнĕ. Çакăн çинчен район администрацийĕн пуçлăхĕн çумĕ - финанс пайĕн начальникĕ Галина Анисимова каласа пачĕ.
Вăлах иккĕмĕш ыйтупа - Елчĕк район бюджетне 2015 çулхи январь-май уйăхĕсенче мĕнле пурнăçланипе паллаштарчĕ. Тупăшсем çак вăхăтра 113 млн тенкĕпе, тăкаксем 117 млн тенкĕпе танлашнă. Хамăр патăмăрти тупăшсем кăçалхи 5 уйăхра 29 млн тенке çитнĕ, пĕлтĕрхи çак вăхăтрипе танлаштарсан 15 процент ÿснĕ.
Районта ялхуçалăх ĕçĕсем мĕнле пынипе ялхуçалăх пайĕн начальникĕ Петр Тремасов паллаштарчĕ. Май уйăхĕн 24-28-мĕшĕсенче районта йĕркеленĕ комисси ялхуçалăх предприятийĕсенче, хресчен /фермер/ хуçалăхĕсенче акса хăварнă ялхуçалăх культурисен калчисен пахалăхне тĕрĕсленĕ. Июнĕн 2-мĕшĕнче ялхуçалăх предприятийĕсен, ял тăрăхĕсен пуçлăхĕсем хутшăннипе унăн итогĕсене пăхса тухнă. «Прогресс» АХОра, «Рассвет», «Комбайн», «Сатурн», «Труд», «Победа», Ленин ячĕллĕ, «Нива», «Клевер», «Урожай», «АСК-Яльчики», А.Севриков, Ф.Шадриков, А.Петров, Ю.Тетмуков, В.Чернов, Г.Афанасьев тата ытти хăш-пĕр ялхуçалăх предприятийĕсемпе хресчен /фермер/ хуçалăхĕсенчи калчасем лайăххисем тесе йышăннă.
Кану кунĕсенче Шупашкар районĕнчи ялти спорт вăййисенче професси ăсталăхне кăтартса механизаторсем, машинăпа ĕне сăвакан операторсем тата çавапа курăк çулакансем те вăй виçнĕ. Пирĕн районтан кайнă механизаторсем унта виççĕмĕш вырăн, Борис Головин /Кĕçĕн Таяпа/ пĕрремĕш вырăн йышăннă, диплома тивĕçнĕ.
Район администрацийĕн пуçлăхĕн пĕрремĕш çумĕ, «Акатуй» праçникне йĕркелесе ирттерсе ярас тĕлĕшпе йĕркеленĕ комитет председателĕ Леонард Левый хатĕрленÿ ĕçĕсем мĕнле пыни çинче чарăнса тăчĕ.