08 июня 2016 г.
Çынсен кулленхи пурнăç шайĕпе çыхăннă ыйтăвĕсене татса парассипе - социаллă хÿтлĕх мерисемпе тивĕçтерессипе тимлекен социаллă ĕçченсен яваплăхĕ пысăк.
Республика Правительстви граждансене социаллă хÿтлĕх парас енĕпе хăй çине илнĕ бюджет тивĕçĕсене пурне те туллин пурнăçласа пырать, уйрăмах ватă çынсем валли пурăнма лайăх мелсем йĕркелесси çине пысăк тимлĕх уйăрать. Хальхи вăхăтра Чăваш Республикин территорийĕнче пурăнакан çынсем социаллă хÿтлĕхĕн 42 тĕрлĕ тÿлевĕпе усă кураççĕ. Социаллă ĕçченсен професси уявĕ умĕн районти халăха социаллă пулăшу паракан пай начальникĕпе Ирина Николаевна Аникинапа тĕл пулсан çакăн пирки тепĕр хут сăмах пуçартăмăр.
Елчĕк районĕнче пурăнакансен 46 проценчĕ тĕрлĕ çăмăллăхсемпе усă курать. Вĕсен ыйтăвĕсене туллин тивĕçтерме тата кашни çын нушине ăнланма тата пулăшма тăрăшакан социаллă ĕçченсене уяв кунĕ ятран палăртса тав тума, пушшех, сăлтавĕ пысăк. Коллектива нумай çул ăнăçлă ертсе пыракан Ирина Аникина чи малтан Алина Кириллова тĕп специалист-эксперт ятне ăшшăн палăртса каларĕ. Алина Юрьевна çынсене социаллă хÿтлĕхĕн регионри çăмăллăхĕсемпе тивĕçтерессишĕн яваплă. Çак тытăмра вăл 30 çул тăрăшать. Наталия Валериевна Николаева тĕп специалист-эксперт патне кирек хăш ыйтупа пырсан та сĕнÿ-канашпа пулăшма пултарать. Саккунсем улшăнса çĕнелнĕ май халăх хушшинче ăнлантару ĕçĕсене туса иртерессипе те вăл нумай вăй хурать. Алевтина Ивановна Борисова социаллă хÿтлĕхĕн федераци çăмăллăхĕсемпе тивĕçтерет, хăйĕн ĕçне лайăх пĕлет, коллективра, районта пурăнакансем хушшинче ят-сум çĕнсе илнĕ. Александр Витальевич Теллин ертсе пыракан специалист-эксперта та нумайăшĕ паллаççĕ, пĕлеççĕ. Вăл «Ĕç ветеранĕ» ята илме тăратнă документсене ĕçлесе хатĕрлет, унсăр пуçне, электронлă системăн базине йĕркелесе пырать. Надежда Владимировна Горшкова тата Марина Владимировна Патшина ача укçипе тивĕçтерес, сахал тупăшлă çемьесене регистраци тăвас, харпăр хăй хуçалăхĕсене тытса пыракансене коммуналлă тăкаксене саплаштарас енĕпе пурнăçламалли ĕçсене йĕркелесе пыраççĕ. Хăйсен шанăçне тивĕçлипе тÿрре кăлараççĕ.
Районти халăха социаллă пулăшу паракан пай коллективĕ май пулнипе усă курса Пенси фончĕн тата социаллă страховани фончĕн тытăмĕсенче, Çирĕклĕ Шăхальти тата Лаш Таяпари стационарлă уйрăмсенче тăрăшакан социаллă ĕçченсене уяв ячĕпе саламлать, малашнехи ĕçре ăнăçусем сунать.
Светлана АРХИПОВА.
Сăнÿкерчĕкре: Марина Патшина, Наталия Николаева, Ирина Аникина, Александр Теллин тата Алевтина Борисова ĕçри ыйтусене сÿтсе яваççĕ.