08 июня 2016 г.
Çынсене пĕрлештерет
Тунтикун вырăс чĕлхин кунне уявланă.
Çак паллă уява вырăссен аслă поэчĕ, хальхи литература чĕлхине никĕсленĕ Александр Сергеевич Пушкин çуралнă кун паллă тăваççĕ. Эпир вăл çырнă юмахсене, поэмăсемпе сăвăсене, повеçсене вуласа ÿснĕ.
Вырăс чĕлхи пек илемлĕ, шухăша тарăн уçса паракан чĕлхе тĕнчере сахал. Вăл тĕнчипех анлăн сарăлнă. Пирĕншĕн те халăхсене пĕрлештерекен чĕлхе шутланать.
Çак кун тĕп библиотекăра Пушкин пурăннă, ĕçленĕ вырăнсемпе паллашнă, унăн произведенийĕсенчен йĕркеленĕ курав ĕçленĕ.
Масара йĕркене кĕртнĕ
Çирĕклĕ Шăхаль ялĕнче сăваплă вырăна - масара йĕркене кĕртнĕ.
Çирĕклĕ Шăхаль ял тăрăхĕн депутачĕсем, администраци, культура ĕçченĕсем масар территорине çÿп-çупран тасатнă, йывăç-тĕме каснă. Çавăн пекех Çирĕклĕ Шăхаль ял старости Владимир Муравьев ертсе пынипе масар çинчи çурта хутса ăшăтакан кивĕ кăмакана çĕннипе улăштарнă.
Хăрушлăх сиксе ан тухтăр
Район администрацийĕн пуçлăхĕн пĕрремĕш çумĕ Л.Левый ертсе пынипе терроризма хирĕç кĕрешекен районти комиссин ларăвĕ иртнĕ.
Унта обществăпа политика, культурăпа спорт мероприятийĕсене ирттернĕ чухне террор акчĕсенчен хÿтĕлессипе çыхăннă, ытти ыйтусене сÿтсе явнă. Кунта «Елчĕкри рынок» ООО директорĕ А.Михайловский, райадминистрацин ятарлă программăсен пайĕн ертÿçи А.Клементьев, культура тата информаципе тивĕçтерекен пайĕн ертÿçи А.Александрова, Курнавăш ял тăрăхĕн пуçлăхĕ Ю.Смирнов, полицин районти пайĕн ертÿçин çумĕ А.Карабурнашев, районти тĕп больницăн тĕп тухтăрĕ Н.Уркова, пушар асăрхавĕн районти уйрăмĕн ертÿçин тивĕçĕсене пурнăçлакан С.Сардаев тухса калаçнă. Ыйтусене сÿтсе явса тивĕçлĕ йышăнусем тунă.
Е.Казначеева - лауреат
Çĕнĕ Шупашкарта республикăри «Хăвна кăтарт» фестиваль-конкурс иртнĕ.
Конкурса Вăрăмхăва ял клубĕ çумĕнчи «Илемпи» театр кружокне ертсе пыракан Л.Казначеева тата унта çÿрекен Е.Казначеева хутшăннă.
«Чăваш Енри Ĕç çыннин çулталăкĕ» номинацире Л.Казначеева II степень диплома, «Чи лайăх вулакан» номинацире Е.Казначеева I степень диплома тивĕçнĕ. Е.Казначеевăна лауреатăн ятарлă кубокĕпе чысланă.