04 июня 2016 г.
Май уйăхĕн 25-мĕшĕнче Раççей Федерацийĕн Президенчĕ нумай ачаллă ашшĕ-амăшĕн пысăк ушкăнне ачисене воспитани парас тата çемьери йăла-йĕркене çирĕплетес ĕçшĕн «Ашшĕ-амăшĕн мухтавĕ» орден медалĕпе наградăласси çинчен 250-мĕш указа алă пуснă. Раççей Федерацийĕнчен медале 67 çын тивĕçнĕ пулсан, вĕсенчен 12-шĕ /17 процент/ Чăваш Енрен.
Çĕршыв Пуçлăхĕн пысăк хакне тивĕçнисен йышĕнче Вырăскассинчи Виталий Васильевичпа Любовь Ивановна Федоровсем те пур.
Любовь Ивановна Çуткÿлти сакăр класлă шкула вĕренсе пĕтерсенех «Урожай» колхозра дояркăра ĕçленĕ. Унăн пĕтĕмĕшле ĕç стажĕ - 38 çул. Вĕсенчен 29 çулне дояркăра тăрăшнă. Пултаруллă хĕрарăма пĕрре мар Курнавăш ял совечĕн депутатне суйланă.
Виталий Васильевич та 38 çул тăван хуçалăхра тăрăшса вăй хунă. Халĕ иккĕшĕ те тивĕçлĕ канура. Çапах та алă усса лармасть 40 çул пĕр-пĕрне çур сăмахранах ăнланса, килĕштерсе пурăннă мăшăр. Хальхи вăхăтра сакăр мăнукне пăхма пулăшаççĕ.
Федоровсем пилĕк ача çитĕнтернĕ. Вĕсем тĕрлĕ отрасльте ĕçлеççĕ. Пурте хăйсен вырăнне тупнă.
Любовь Ивановнăпа Виталий Васильевич ачисемшĕн яланах ырă тĕслĕх вырăнĕнче. Яланах сывă пурнăç йĕркине тытса пыраççĕ, ĕçрен ÿркенмеççĕ. Ачисене те мĕн пĕчĕкрен ĕçе хăнăхтарнă. Паян та хисеплĕ мăшăр общество пурнăçĕнчен пăрăнмасть. Нумай ачаллă çемье ял çыннисемшĕн пур енĕпе те ырă тĕслĕх пулса тăрать.
Чăваш Республики нумай ачаллă çемьесене пур енлĕн патшалăх пулăшăвĕ парать. Бюджет хĕсĕк пулин те граждансене социаллă пулăшу памалли мерăсене упраса хăварнă, çак тĕллевпе кăçал 7 млрд тенкĕ уйăрнă. Çавăн пекех республикăри демографи лару-тăрăвне çирĕплетес тĕллевпе 2013 çулхи январĕн 1-мĕшĕнчен виçĕ е ытларах ача çуратнă çемьесене ача виçĕ çул тултариччен уйăхсерен 8142 тенкĕ тÿлеççĕ. Кунсăр пуçне вĕсене пурăнмалли çурт-йĕрпе коммуналлă пулăшусемшĕн тÿлеме çăмăллăхсем, амăшĕн капиталĕн çумне республикăри амăшĕн капиталне хушса параççĕ.
Сăмах май каласан, «Ашшĕ-амăшĕн мухтавĕ» орден медале тăватă е ытларах ача çуратса ÿстернĕ /е усрава илнĕ/ çемьесене параççĕ. Паян Чăваш Республикинче 11 пин ытла нумай ачаллă çемье пурăнать, вĕсенче 30 пин ытла ача çитĕнет. Республикăри кашни 15-мĕш çемье виçĕ е ытларах ача воспитани парать. Çакă паянхи Чăваш Еншĕн норма пулса тăрать.
Чăваш Ен Пуçлăхĕ Михаил Игнатьев çемье хаклăхне упрас, çитĕнекен ăрăва Тăван çĕршыва юратма вĕрентес, чăваш халăхĕн ырă йăли-йĕркине тĕпе хурса кăмăл-сипет туйăмне çирĕплетес енĕпе нумай ачаллă çемьесем ырă тĕслĕх пулса тăнине палăртать.
Сăнÿкерчĕкре: Любовь тата Виталий Федоровсем ачисемпе, кинĕсемпе, кĕрÿшĕсемпе, мăнукĕсемпе.