04 июня 2016 г.
Июнĕн 1-мĕшĕнче çĕр çинче Пĕтĕм тĕнчери ачасен кунне паллă турĕç. Пирĕн çĕршывра çак праçник çуллахи каникул пуçламăшĕпе, ачасен сывлăхне çирĕплетекен лагерьсенче пĕрремĕш смена пуçланнипе тата ачасем аслашшĕсемпе асламăшĕсем патне яла кайнипе пĕр килет.
Çак кун пĕтĕм республикипе тĕрлĕрен уяв мероприятийĕсем иртнĕ. Вĕсене шкул ачисем те, ача сачĕсен воспитанникĕсем те хутшăннă.
«Ачасен ирхи зарядки» флэш-моб чи масштаблисенчен пĕри пулчĕ-тĕр. Вăл июнĕн 1-мĕшĕнче Шупашкарти Хĕрлĕ лапамра иртнĕ. Чăваш Енĕн тĕп хулинче ăна кăçалхипе виççĕмĕш хут йĕркелерĕç. Кашнинчех пин-пин участника - ача сачĕсен воспитанникĕсене, воспитательсене, ашшĕ-амăшне пуçтарнă. Мероприятие йĕркелекенсем палăртнă тăрăх, ачасен ирхи зарядкине Шупашкар хулинчи ача сачĕсене çÿрекен 10 пин ача хутшăннă.
Уяв мероприятийĕсем Хĕрлĕ лапамра кăна мар, парксенче те иртнĕ. Акă, «Лакрей вăрманĕ» паркра «Страна почемучек» йăпанупа вăйă программи иртнĕ. Конкурса хутшăннă çамрăк эрудитсене, вĕсен ашшĕ-амăшне, мероприятин мĕнпур участникĕсене Чăваш Республикин Патшалăх Канашĕн Председателĕн заместителĕ Николай Малов тата Шупашкар хулин Пуçлăхĕ Леонид Черкесов саламланă. Николай Малов июнĕн 1-мĕшĕ ачасен чи пысăк уявĕсенчен пĕри - çу тата шкулта каникул пуçламăшĕ пулнине палăртнă. Çакă юлташсемпе тĕлпулусен, манăçа тухми çулçÿревсен тата чăн-чăн приключенисен ылтăн тапхăрĕ», - тенĕ ЧР Патшалăх Канашĕн Председателĕн заместителĕ. - Эпĕ яла та, юратнă пĕвене те, пулă тытнине те ас тăватăп. Манăн вăхăтра уяв хальхи вăхăтри пек пĕлтерĕшлĕ пулман, анчах июнĕн 1-мĕшне чăн-чăн праçник вырăнне хунă. Пирĕн тĕп тĕллев - çак вăхăта пирĕн ачасем çавăн пек йышăнмалла тăвасси пулса тăрать».
Уяв мероприятийĕсене 300 яхăн хула çынни хутшăннă. Ачасен асфальт çинчи ÿкерчĕксен конкурсĕ пулса иртнĕ. Çĕнтерÿçĕсем призсене - плюш упа çурисене, паркри аттракционсенче ярăнма билетсене тивĕçнĕ.
Çав вăхăтрах çакна та манса каймалла мар: Пĕтĕм тĕнчери ачасен кунне уяв пек паллă тăватпăр пулин те, çитĕннисен ачасене хăрушсăрлăхпа тивĕçтересси çинчен самантлăха та манса каймалла мар. Çакă уйрăмах халĕ - çуллахи каникул кунĕсенче çивĕч тăрать. Ачасен пурнăçĕ тата сывлăхĕ пĕтĕмпех вĕсен ашшĕ-амăшĕн хулпуççийĕ çине тиенет.