04 июня 2016 г.
Чăваш наци библиотекинче Ĕç çыннин çулталăкне халалласа Н.Карлин композиторăн пултарулăх каçне ирттернĕ.
Аслă Елчĕкре çуралса ÿснĕ юрă-кĕвĕ ăсти - Чăваш Республикин культурăн тава тивĕçлĕ ĕçченĕ, Раççей писателĕсен пĕрлĕхĕн тата Чăваш композиторĕсен ассоциацийĕн членĕ, Н.Г.Гарин-Михайловский, Н.Янкас ячĕллĕ премисен лауреачĕ, В.М.Щукин ячĕллĕ хисеп паллине тивĕçнĕ.
Николай Сергеевич тĕрлĕ тăрăхра ĕçленĕ, анчах пур çĕрте те хорсем йĕркелесе вĕсене пултарулăх шайĕнче çÿле çĕклеме пултарнă. Коллективсен репертуарĕнче композитор илемлетнĕ чăваш халăх юррисем, хăй çырса кĕвĕленĕ хайлавсем ытларах. Эпир тĕрлĕ савăнăçлă мероприятире вунă çул усă куракан «Чыс, мухтав сире, Елчĕксем» район гимнĕн авторĕ те вăлах.
Унăн пултарулăхне хакласа сăмах илнисем - Шупашкарти «Елчĕксен ентешлĕхĕ» обществăлла организаци хастарĕсем Петр Сидоров, Юрий Карпов, Александр Евтихеев, Аслă Елчĕкри Г.Н.Волков ячĕллĕ вăтам шкул директорĕ Николай Малышкин -сăвви-юррисен халăхлăхне, шухăшлăхне уйрăммăн палăртнă. Пултарулăх коллективĕсем унăн юррисене шăрантарнă.
Мероприятире çавăн пекех В.Эктел премийĕн лауреачĕсене палăртнă. Районти вĕренекенсем хушшинче ирттерекен конкурсра Патреккелĕнчи 6-мĕш класри Ирина Петрова çĕнтернĕ.
Н.МАЛЫШКИН.