01 июня 2016 г.
«Рассвет» ялхуçалăх производство кооперативĕнче малтанласа 30 гектар çинче утăлăх çулнă нумай çул ÿсекен курăк, çанталăк уяр тăнине пула, хăвăрт кушăхрĕ. Çавна май ăна кунта пухса кĕртме тухнă та.
Тăпрара нÿрĕк çителĕклĕ пулнăран курăк шыв пек пĕр тикĕс, парка çитĕннĕ, утă пахалăхĕ те лайăх. Фермăри выльăх-чĕрлĕхе хĕл кунĕсенче тăрантарма уйăрнă курăк лаптăкĕ вара 100 гектар шутланать.
Ĕçе çын тăвать. Сергей Баймушкин механизатор хăйĕн пулăшаканĕпе - Александр Волковпа пĕрле малтан палăртнă лаптăкри курăка çулса валемсене хыврĕç пулсан, халĕ вĕсем ăна хăйсемех пухса кĕртеççĕ. Алексей Мясников кĕрепле-ворошилкăпа ĕçлет.
Ялхуçалăх предприятийĕнче пĕрчĕллĕ тата пăрçа йышши культурăсен лаптăкĕсене çумкурăкран тата тĕрлĕ хурт-кăпшанкăран хÿтĕлесе им-çам сапас ĕçе те агротехника хушнă чи лайăх вăхăтра пурнăçланă.
Светлана АРХИПОВА.
Сăнÿкерчĕкре: Виктор Цыганов тĕп агроном яваплă тапхăрта уй-хиртен ниçта пăрăнмасть. Вăл Алексей Мясников, Сергей Баймушкин, Александр Волков механизаторсемпе пĕрле.