01 июня 2016 г.
Район администрацийĕн пуçлăхĕ Николай Миллин тунтикун район администрацийĕн структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ. Унта эрне итогĕсене пăхса тухнă, малашнехи тĕллевсене палăртнă.
Пĕрремĕш ыйту пушар хăрушсăрлăхĕ пирки пулнă. Çакăн пирки тĕплĕн чарăнса тăнă пушар асăрхавĕн районти инспекцийĕн ертÿçи Александр Сайкин кăçалхи 5 уйăхра район территорийĕнче 5 пушар тухнине, вĕсен тăкакĕ 400 ытла пин тенкĕпе танлашнине палăртнă. Пушар - хăрушă, инкекпе куçа-куçăн тĕл пулас мар тесен кашни çыннăн сыхă пулмалла. Çуллахи вăхăтра уйрăмах пушар тухас хăрушлăх пысăк. Район администрацийĕн пуçлăхĕ Николай Миллин яваплă службăсен тимлĕхĕ пирки чарăнса тăнă. Çавăн пекех Кĕçĕн Шăхаль ялĕнче пулса иртнĕ пушарта инкек тÿснĕ нумай ачаллă Федоровсен çемйине килсе çапнă нушана чун-чĕререн ăнланнине палăртса пурне те - ертÿçĕсене, районта пурăнакансене май пур таран - укçан е япала парса пулăшма чĕнсе каланă.
Экономика, пурлăх тата çĕр хутшăнăвĕсен пайĕн начальникĕ Марина Павлова предприниматель ĕç-хĕлне аталантарасси пирки чарăнса тăнă. Район экономикине тата социаллă пурнăçне аталантарассинче пĕчĕк тата вăтам предприятисемпе предпринимательсем пысăк тÿпе хываççĕ. Хальхи вăхăтра районта пĕчĕк тата вăтам предпринимательлĕхĕн 589 субъектне, çав шутран 113 пĕчĕк тата вăтам предприятие, 476 уйрăм предпринимателе шута илнĕ. Отрасльсен структурине тĕпе хурса пайлас пулсан хальхи вăхăтра вĕсенчен 33,4 проценчĕ суту-илÿ тата обществăлла апатлану ĕçне йĕркелесе пырать, 28,8 проценчĕ ялхуçалăхĕнче, 22,5 проценчĕ ĕçлесе хатĕрлекен производствăра, 9,9 проценчĕ йăла ыйтăвĕсене тивĕçтерес ĕçре, 5,4 проценчĕ строительствăра тăрăшаççĕ. Çапла майпа кăçалхи апрелĕн 1-мĕшĕ тĕлне районти пĕчĕк тата вăтам предприятисенче 1595 çын вăй хунине шута илнĕ. Вĕсен пĕр уйăхри вăтам ĕç укçи 13154 тенкĕпе танлашнă.
Сăмах май, майăн 26-мĕшĕнче Раççей предпринимательлĕх кунĕ пулнă. Уяв пулнипе усă курса районти пуçаруллă та хастар уйрăм предпринимательсене - Валерий Изратовпа Татьяна Тепловăна Чăваш Республикин Экономика аталанăвĕн, промышленноç тата суту-илÿ министерствин Тав çырăвĕсемпе чысланă.
Уй-хир ĕçĕсемпе ялхуçалăх пайĕн начальникĕ Петр Тремасов паллаштарнă. Районта ака ĕçĕсене агротехника хушнă чи лайăх вăхăтра вĕçленĕ. Майăн 30-мĕшĕ тĕлне пĕрчĕллĕ тата пăрçа йышши культурăсен 6000 гектар лаптăкне çумкурăкран тата тĕрлĕ хурт-кăпшанкăран хÿтĕлесе им-çам сапнă. «Комбайн» ЯХПКра, «Яманчурино», «Победа», «Энтепе» ОООсенче нумай çул ÿсекен курăксене çулма тухнă. Иртнĕ эрнере ялхуçалăх предприятийĕсемпе хресчен /фермер/ хуçалăхĕсенче калчасем мĕнле шăтса тухнине комиссипе тĕрĕслес ĕçе вĕçленĕ. Итогсене çитес кунсенче ирттерме палăртнă районти канашлура пĕтĕмлетеççĕ.
Районти полици пайĕн начальникĕн çумĕ Алексей Карабурнашев тĕрлĕ мелсемпе усă курса тÿрĕ кăмăллă çынсене улталакансенчен асăрханасси пирки чарăнса тăнă.
Аттелĕхĕн Аслă вăрçинче Çĕнтерÿ тунăранпа 71 çул çитнине халалласа тăван тăрăхри паллă вырăнсем тăрăх «Мăн асаттесен çулĕпе» ятпа велосипедпа чупассине йĕркеленĕ. Культура тата информаципе тивĕçтерекен пай начальникĕ Антонина Александрова иртнĕ шăматкун пулса иртнĕ чупăвăн 1-мĕш тапхăрне пĕр харăс тĕрлĕ ÿсĕмри 56 çын, çула май унта тата 200 ытла çын хутшăннине палăртнă. Велосипедпа чупассин иккĕмĕш тапхăрне август уйăхĕнче ирттерме палăртнă.