01 июня 2016 г.
2014-2015 вĕренÿ çулĕнче Елчĕкри пĕтĕмĕшле пĕлÿ паракан вăтам шкулта кадет класĕ уçăлчĕ. Ку, паллах, шкулшăн пысăк çитĕнÿ. Паян шкулта икĕ кадет класĕ. 6 «к» класра 24 вĕренекен /ертÿçи - В.Николаев/, 5 «к» класра – 20 вĕренекен /ертÿçи С.Долгов/. Ачасене аслă категориллĕ, пысăк опытлă вĕрентекенсем пĕлÿ параççĕ.
Районти тĕрлĕ шкулсен тăваттăмĕш класĕсенчен вĕренсе тухакансен асăннă класа килес тесен тест ĕçĕсем витĕр тухмалла. Ытларах вырăс чĕлхи, математика, тăван тавралăх предмечĕсене аван пĕлни кирлĕ. Кадет класĕнчи вĕренÿ программине обществознани, ОБЖ предмечĕсем кĕреççĕ.
Шкулта спорт енĕпе аталанма мĕнпур майсем пур. Çакна шута илсе кадет класĕнче эрнере пĕрре кĕрешÿ секцийĕ йĕркеленĕ. Ăна С.Александров тренер ертсе пырать. Унта ачасем кĕрешĕвĕн тĕрлĕ меслетне алла илме хăнăхаççĕ.
Пĕр çемьери пек туслă вĕренеççĕ тĕрлĕ ял ачисем. Малашлăх калчисем пур çĕрте те малта пулма тăрăшаççĕ. Районта, республикăра иртекен мероприятисенчен те пăрăнмаççĕ. Кадет класĕнче вĕренни ачасен пултарулăхне тĕрлĕ енлĕ аталанма пулăшать, тăрăшуллă та хастар пулма хавхалантарать.
Н.КУШМАНОВА.