01 июня 2016 г.
Марта Смирнова Кĕçĕн Шăхаль ялĕнче çуралса ÿснĕ. Çĕнĕ Пăва шкулĕнче тăхăр класс пĕтернĕ хыççăн Шупашкарти механикăпа технологи техникумĕн шкулчченхи вĕренÿ уйрăмне /2016 çулхи апрель уйăхĕнчен Н.В.Никольский ячĕллĕ професси колледжĕ/ вĕренме кĕнĕ. Марта пĕрремĕш курсра кăна вĕренет пулсан та вĕренÿре те, творчество ĕçĕнче те палăрма ĕлкĕрнĕ.
- Марта, мĕншĕн эсĕ воспитатель профессине суйласа илетĕн?
- Эпĕ ачасене питĕ юрататăп. Пепкесем - пурнăç чечекĕсем. Ача садне пырса кĕретĕн те - сан йĕри-тавра лара-тăра пĕлмен, пĕтĕмпех пĕлме тăрăшакан пепкесем. Вĕсен куçĕсем çиçсе те йăлтăртатса, хĕлхем сапса тăраççĕ. Тепĕр самантранах эсĕ вĕсен пурнăçĕпе пурăнма пуçлатăн. Куçĕсенчен пăхатăн та пĕтĕмпех ăнланатăн: вĕсем те пирĕн пекех пăлханчăк, пин-пин ыйту... Воспитатель пулма шухăш тытнине атте-анне те ырларĕ.
- Мĕншĕн эсĕ çак колледжа суйласа илтĕн?
- Шупашкарти Н.В.Никольский ячĕллĕ професси колледжĕнче воспитательсемсĕр пуçне ытти специальноçсене те алла илме пулать. Тĕслĕхрен, дизайнер, рекламăпа ĕçлекенсем тата ыттисем те. Колледж татах та малалла аталанса пырать. 2016-2017 вĕренÿ çулĕнче пуçламăш классенче вĕрентекенсене хатĕрлеме плана кĕртнĕ.
- Пушă вăхăта мĕнле ирттеретĕн?
- Шел пулин те, пушă вăхăт çукпа пĕрех. Çапах чылай хĕрупраç пекех ал ĕçĕ тума юрататăп. Кĕнеке вулатăп.
- Маттурах çав эсĕ, вĕренÿре те ĕлкĕрсе пыратăн, колледжри мероприятисене те хутшăнатăн.
- Малтанах çăмăл марччĕ. Юратнă тантăшсем ялта юлнă. Халĕ çĕнĕ юлташсем тупрăм. Колледж пурнăçĕ ман пурнăç: наука тĕлĕшĕнчен те, пултарулăх енчен те. Вĕренÿре ĕлкĕрсе пырас тесе пĕтĕм вăя хуратăп. Информаци предмечĕ килĕшнĕрен тĕрлĕрен конкурссене, математика, естествознани тата истори предмечĕсемпе олимпиадăсене хутшăнтăм. Естествознанипе иккĕмĕш вырăн йышăнтăм.
- Пуласлăхра эсĕ хăвна мĕнле куратăн?
- Пĕтĕм чун-чĕрене хамăн юратнă профессие парасшăн. Ачасем эпĕ пулăшнипе тĕрĕс аталанса ÿсчĕр.
- Марта, професси суйлакан çамрăксене мĕн суннă пулăттăн?
- Пулас профессие суйлани хăвăн малашнехи пурнăçа суйланиех. Юратман, кăмăл туртман ĕçре пурнăçа ирттересси çăмăл мар. Çавăнпа та чи малтан пурнăçри тĕллевсене палăртмалла. Сирĕнте пурнăç малашлăхĕ! Тăрăшса вĕренĕр, хăвăра ăс паракансене хисеплĕр, тăван чĕлхене упрăр. Ăнăçу пурне те!
Катя КАНЮКОВА калаçнă.
Кĕçĕн Шăхаль ялĕ.