28 мая 2016 г.
Экзаменсем пуçланчĕç
Хальхи вăхăтра тăххăрмĕшсемпе вунпĕрмĕшсен хĕрÿ вăхăт - хăйсен пĕлĕвне экзаменсенче тĕрĕслеççĕ.
Виçĕмкун обществознание, химие, литературăна тата информаципе ИКТна кăмăллакан тăххăрмĕшсем патшалăхăн пĕтĕмлетÿ аттестацийĕ витĕр тухрĕç. Ĕнер вара вунпĕрмĕшсем географипе, литературăпа ППЭ тытрĕç.
«Кумсем» - гастрольте
Елчĕкри «Кумсем» ушкăн куракансене тăтăшах хăйсен илемлĕ юрри-кĕввипе савăнтарать.
Хальхинче вĕсем хăйсен пултарулăхĕпе Пушкăрт Республикинчи тата Екатеринбург хулинчи чăвашсене тыткăна илнĕ. Мĕнлерех йышăннă вĕсене унти халăхсем тетĕр-и? Тĕлĕнсе каймалла вăйлă! Урăхла пулма та пултараймасть. Мĕншĕн тесен Елчĕксем яланах – чи чăнкисем. Кумсем - Шурбинсемпе Архиповсем.
Аттестатпа пĕрле свидетельство
Курнавăшри тăхăр выпускник патшалăхăн пĕрлехи экзаменĕсене тытнипе пĕрлех професси ăсталăхĕн предмечĕсемпе те тĕрĕслев витĕр тухаççĕ.
Вĕсем аттестатпа пĕрле тракторист-машинист, водитель свидетельствисене алла илеççĕ. Выпускниксен пĕрремĕш экзаменĕ хыçра ĕнтĕ.
Малтисен ретĕнче
Çирĕклĕ Шăхальти вăтам шкул кашни çулах «Салют, Çĕнтерÿ!» республикăри акцие хутшăнать.
Кăçал 10 класра вĕренекен Наталия Федорова «Çулталăкри чи лайăх тимуровец» номинацире иккĕмĕш, шкул коллективĕ виççĕмĕш вырăнсене тухнă. Маттурсем дипломсене тата парнене тивĕçнĕ.
Пушара хирĕçле режим
Çу уйăхĕн 22-мĕшĕнчен пуçласа республикăра пушара хирĕçле режим çирĕплетнĕ.
Раççей МЧСĕн Чăваш Республикинчи тĕп управленийĕ пĕлтернĕ тăрăх - пушара хирĕçле ятарлă режим вăхăтĕнче вăрмансенче кăвайт чĕртме, вут-кăвар çинче апат-çимĕç хатĕрлеме, вăрмансенче тата вĕсемпе юнашар территорисенче çÿп-çап çунтарма юрамасть.
Елчĕксем палăрнă
Чăваш Республикин Вĕренÿ институчĕ регионсем хушшинче «Чăваш çĕршывĕ - Улăп çĕршывĕ» конкурс йĕркеленĕ.
Унта районти пуçламăш классен вĕрентекенĕсем те йышлăн хутшăннă. Елчĕкри И.Идутовăпа Курнавăшри Ф.Порфирьева педагогсем чăваш чĕлхин кунне халалланă «Тăваттăмĕшсен класс тулашĕнчи мероприятийĕ» сценари çырса виççĕмĕш вырăна тухнă.