21 мая 2016 г.
Паянпа ыран «Елчĕк ене» çитес çур çулта илсе тăма ытти чухнехинчен 32,58 тенкĕ йÿнĕрех хакпа çырăнса илме пулать.
Çавна май маларах çырăнса илейменнисем паянах почтальонкăсемпе тĕл пулăр, почта çыхăну уйрăмĕсене çитĕр.
Елчĕкри почта çыхăну уйрăмĕнчи почтальонкăсем хăйсен участокĕнче пурăнакансемпе тĕл пулса хаçат-журнал çырăнтараççĕ.
- Ял çынни кашни тенкĕне перекетлеме тăрăшать. Çавна май йÿнĕрех чухне çырăнтарас тесе ăнтăлатпăр, - тет Зинаида Архипова почтальонка.
Вăл ÿркенсе тăракан йышши мар, кашни киле çитет, кашни çынпа пĕр сăмах тупма пултарать. Хальхи вăхăтра район хаçатне 162 çемьене валеçет, ĕнер кăна 20 çемьене «Елчĕк ен» хаçат çырăнтарчĕ.
Район хаçатне тус-юлташне, хурăнташ-тăванне çырăнтарса парас ырă йăла та çирĕпленсех пырать. Елчĕкре пурăнакан хисеплĕ çыннăмăр, пичет ветеранĕ Анатолий Тимофеев-Сăрнай районти тĕп больницăри хирурги, терапи, ача-пăча уйрăмĕсене, «Васкавлă пулăшу» службине «Елчĕк ен» хаçата çырăнса пани ыттисене те хавхалантарасса шанас килет.