21 мая 2016 г.
«Единая Россия» партин регионти организаци комитетĕнче малтанхи сасăлава ирттерессипе пресс-конференци пулнă. Унта парти представителĕсем сасăлава мĕнле йĕркелесси тата вăл суйлавран мĕнпе уйрăлса тăни пирки ăнлантарса панă.
Майăн 22-мĕшĕнче Чăваш Енре РФ Патшалăх Думине тата республикăн Патшалăх Канашне депутатсене суйлассипе малтанхи сасăлав иртет. Ун чухне пирĕн республикăра 236 сасăлав участокĕ ĕçлĕ, çĕршывра - 19 пин.
Чăваш Ен суйлавçисен «Единая Россия» парти тăратнă кандидатсене суйлама тивет, вĕсем кайран çĕршыври тата республикăри саккун кăларакан орган влаçĕсене суйланма тăратĕç.
«Единая Россия» - суйлава тăратнă кандидатсемпе уçă тата демократилле малтанхи сасăлав йĕркеленĕ пĕртен-пĕр парти. Партин регионти уйрăмĕн ертÿçи Николай Малов сентябрĕн 18-мĕшĕнче иртекен суйлав валли кандидатсене тăратнă чухне суйлавçăсен шухăшĕ тĕп вырăнта пулассине палăртнă.
Шутлав участокĕнче кашни суйлавçа виçĕ бюллетень параççĕ. Пĕрремĕшĕ - пĕр мандатлă округпа Патшалăх Думине суйламалли. Иккĕмĕшĕ те Патшалăх Думинех, анчах парти списокĕпе. Виççĕмĕшĕ - Чăваш Патшалăх Канашне, пĕрлех пĕр мандатлă округа тата парти списокĕпе. Сасăлава хутшăнаканăн çумĕнче паспорт кирлĕ /çавăн пекех сентябрьччен 18 çул тултаракан çамрăксем те хутшăнма пултараççĕ/.
Малтанхи сасăлавпа суйлав хушшинче уйрăмлăхсем пур: бюллетеньсем çине суйлавçăсем хăйсем шанакан темиçе кандидатшăн та паллă тума пултараççĕ. Çав вăхăтрах Патшалăх Канашĕ валли хатĕрленĕ бюллетеньре икĕ кандидатшăн паллă лартмалла - пĕр мандатлă округпа тата парти списокĕпе.
Тепĕр уйрăмлăх - шутлав участокĕсем суйлав участокĕсенчех вырнаçĕç, анчах вĕсем сахалтарах пулĕç. Малтанхи сасăлавăн организаци комитетĕнче ăнлантарнă тăрăх, çакă йывăрлăхсем кăларса тăратмĕ.
Пĕрремĕшĕнчен, участоксен адресĕсем партин регионти уйрăмĕн сайтĕнче chuvash.er.ru “Предварительное голосование» пайра пур. Иккĕмĕшĕнчен, кашни суйлавçă ятран янă йыхрав илет. Унта шутлав участокĕн адресĕ паллă. Кунсăр пуçне маларах сасăлассипе «хĕрÿ лини» ĕçлет. Ун тăрăх суйлавçăсем хăйсене кирлĕ информацие, сасăлав вырăнне, вăхăтне пĕлĕç.
Хушса хуратпăр, маларах сасăлав ирттерессине агитаци тапхăрĕ те хистерĕ, çав вăхăтра кандидатсем калаçусем йĕркелерĕç, суйлавçăсемпе, ĕç коллективĕсемпе тĕл пулчĕç. Николай Малов калашле Раççей Президенчĕ В. Путин маларах сасăлав ирттерни «Единая Россия» партине халăхпа çывăх тата уçăмлă пулма май парать текен шухăш тепĕр хут çирĕпленет. Унта хатĕрленнĕрен тепĕр хут паянхи кун республикăра пурăнакансен ыйтăвĕсемпе проблемисем çывăххăн тухса тăчĕç, вĕсене май пур таран татса парас ĕçе пуçăнма пулчĕ.
Николай Малов «Единая Российăшăн» Чăваш Енре пурăнакансем маларахри суйлава хастар хутшăнни пысăк пĕлтерĕшлĕ пулнине палăртать. «Эпир пирĕн суйлавçăсенчен пулăшу тата канаш ыйтатпăр. Пайăрлă кандидатсемшĕн панă сасăсем пирĕн партине малашнехи Патшалăх Думипе Чăваш Енри Патшалăх Канашĕн суйлавĕсене хутшăнма май парĕç», - тенĕ Николай Малов.