21 мая 2016 г.
2016 çулхи Пĕтĕм Раççейри ялхуçалăх çыравне хатĕрленнĕ май Чăвашстат çак пулăма халалланă курав фильмĕ ÿкернĕ.
Çыравçăсем респондентсемпе – харпăр хăй хуçалăхĕсен хуçисемпе тата хресчен /фермер/ хуçалăхĕсен ертÿçисемпе тĕл пулса калаçни сюжетра тĕп вырăн йышăнать. Унта пурнăçра сиксе тухма пултаракан лару-тăрăва та уçса панă. Тĕслĕхрен, фермер çак мероприяти çинчен пĕлет, анчах хăйĕн хуçалăхĕ пирки пĕлтересшĕн мар. Çыравçăн çĕр ĕçченне ăнлантарма пултармалла: ыйтăм листисене йĕркелемешкĕн вăхăт тупаймасан та альтернативлă майпа - электронлă меслетпе хуравлама юранине аса илтермелле. Çыравçă ĕçĕ, чăннипех, яваплă та кăткăс пулнине çирĕплетет çакă. Унсăр пуçне, унăн пысăк тавракурăмлă, чăтăмлă пулмалла тата çыннăн кăмăлне çавăрма пĕлмелле.
Кинофильм Раççей Федерацийĕн Президенчĕн Владимир Путинăн сăмахĕсемпе вĕçленет, вăл çапла палăртнă: «Раççей ялĕ экономика тĕлĕшĕнчен ăнăçлă тата инвестици енĕпе илĕртÿллĕ пулма пултарать те, тивĕç те. Апла пулсан, ялхуçалăхне пулăшмалла, çав вăхăтрах хÿтлĕх мелĕсен эффективлăхĕ çинчен манмалла мар».
Такмаксен конкурсĕ
Ялхуçалăх çыравне халалланă такмаксен конкурсĕ малалла тăсăлать, вĕсене майăн 31-мĕшĕччен йышăнаççĕ.
Конкурсăн хавхалантару фончĕ 50000 тенкĕпе танлашать. Тĕплĕнрех ялхуçалăх çыравĕн пресс-центрĕн vshp2016ĕru сайтĕнче çырса кăтартнă.
Л.ГОРШКОВА,
Чăвашстатăн çырав енĕпе ĕçлекен Елчĕк районĕнчи уполномоченнăйĕ.