18 мая 2016 г.
Раççей почти «Ырлăх йывăçĕ» ятпа Пĕтĕм Раççейри ыркăмăллăх акцийĕ ирттересси çинчен пĕлтернĕ.
Раççейре хаçат-журнал çырăнтармалли тапхăр вĕçлениччен - июнĕн 30-мĕшĕччен предприятисемпе организацисем, уйрăм çынсем ача-пăча социаллă учрежденийĕсене, ваттисемпе сусăрсем вăхăтлăх пурăнакан çурчĕсене, ĕçпе вăрçă ветеранĕсене, ватă çынсене хăйсен шучĕпе республикăра тухса тăракан хаçатсемпе журналсем çырăнтарса пама пултараççĕ. Çак ырă пулăма виçĕмкун «Промсервис» НПО акционерсен хупă обществин генеральнăй директорĕ Юрий Николаевич Титов хутшăнчĕ: Лаш Таяпари, Çирĕклĕ Шăхалĕнчи ваттисен вăхăтлăх пурăнакан çурчĕсене, халăха социаллă пулăшу паракан центра «Елчĕк ен» хаçата кăçалхи иккĕмĕш çур çулта илсе тăма хăй шутĕнчен çырăнтарса пачĕ. Çакнашкал тĕслĕхсем татах пур. Акă, Кĕçĕн Таяпа ял тăрăхĕнчи Надеждăпа Борис Головинсем «Елчĕк ен» хаçат призне çĕнсе илессишĕн пынă ăмăртура çĕнтернĕшĕн тивĕçекен хаçата Çирĕклĕ Шăхалĕнчи ваттисен çуртне парса тăма ыйтрĕç.
Районти ялхуçалăх предприятийĕсем, уйрăм çынсем хăйсем патĕнче ĕçлесе тивĕçлĕ канăва тухнă ватăсене тÿлевсĕр хаçат-журнал çырăнтарса панă тĕслĕхсем пайтах. Çакăн çинчен çырусем кĕтетпĕр, вулакансем!
Н.АЛЕКСЕЕВ.
Сăнÿкерчĕкре: районти почтамтри Галина Баранова оператор Юрий Титовран ваттисен çурчĕсене «Елчĕк ен» хаçата çырăнтарса пама заказ йышăнать.