18 мая 2016 г.
ятпа иртрĕ Пĕтĕм тĕнчери çемье кунне халалланă уяв районти хăтлă та капăр ЗАГС пайĕнче.
Çемье – пурнăç тĕрекĕ. Унран хаклăраххи мĕн пур-ши? Çемьере-çке эпир çынна хисеплеме, юратма, яваплăха туйма вĕренетпĕр. Мăшăрлă пурнăçра пĕр-пĕрне хисеплесен, пĕр-пĕрин интересĕсене шута хурсан, ăнлансан, пĕр-пĕрне шанма, каçарма пĕлсен - çемье çирĕп те вăйлă пулни куçкĕретех. Пирĕн çĕршывра телейлĕ çемьесем мĕн чухлĕ ытларах, çавăн чухлĕ пирĕн общество та çирĕпрех, тĕреклĕрех, илемлĕрех.
Çемье ача-пăча сассипе илемлĕ. Районта кăçал 32 ача çуралнă. Вĕсенчен 7-шĕ пĕрремĕш ача, 16-шĕ иккĕмĕш, 6-шĕ виççĕмĕш, 2-шĕ тăваттăмĕш ачаллă çемьере кун çути курнă. Çавăн пекех пиллĕкмĕш ача çуратакан çемье пурри те савăнтарать.
Акă, Елчĕк ялĕнче пурăнакан Светлана Михайловнăпа Владимир Алексеевич Петровсем 20 çул пĕр-пĕрне çур сăмахранах ăнланса, шăкăл-шăкăл калаçса пурăнаççĕ. Туслă та çирĕп çемьере пилĕк пăхаттир çитĕнет. Çемье пуçĕ Тĕмерти шкулта ачасене вĕрентнипе пĕрлех «Елчĕк ен» хаçат редакцийĕнче водитель пулса тăрăшать. Мăшăрĕ «Солнышко» ача садĕнче воспитателе пулăшаканĕнче ĕçлет.
Петровсен аслă ывăлĕ арçын тивĕçне пурнăçласа салтак аттине хывсан Мускаври автозавода ĕçе вырнаçнă. Ĕçленĕ хушăрах ятарлă вăтам пĕлÿ илес тесе вĕренет. Сергей кăçал 11 класс пĕтерет. Вăл технологи предмечĕпе юлашки икĕ çул республика шайĕнче призлă вырăн йышăннă. Часах Алеша саккăрмĕш, Миша пĕрремĕш класс пĕтереççĕ. Кĕçĕнни, Володя, ача садне çÿрет.
Тăрăшуллă çемье хăйсен вăйĕпе çĕнĕ çурт лартнă. Петровсем ывăлĕсене мĕн пĕчĕкрен ĕçе хăнăхтараççĕ. Ашшĕпе амăшĕ вĕсемшĕн пур енĕпе те ырă тĕслĕх пулса тăраççĕ.
Светлана Васильевнăпа Сергей Всеволодович Александровсен çемье стажĕ - 19 çул. Светлана «Кристалл» кафере бухгалтерта тăрăшать. Кил хуçи Елчĕкри шкулта физкультура учителĕ тата ачасемпе çамрăксен спорт шкулĕнче тренерта ĕçлет. Вĕсен виçĕ ывăл çитĕнет. Асли, Дмитрий, Мускаври çар академийĕнче вĕренет, спорт мастерĕ. Артемий те, ашшĕпе пиччĕшĕ пекех, спортпа туслă. Тăххăрмĕш класра вĕренекенскер кĕрешÿ вăййине кăмăллать. Кĕçĕнни, Кирилл, пилĕк уйăхра.
Тип Тимешри Екатерина Николаевнăпа Виктор Валерьевич Цыгановсем кăçал виççĕмĕш ачине алла илнĕ. Аслисем, Дарья тата Аделина, ача садне çÿреççĕ. Çемье пуçĕ «Рассвет» ялхуçалăх производство кооперативĕнче тĕп агрономра вăй хурать. Виçĕ ача амăшĕ Елчĕкри халăха социаллă пулăшу паракан центрта тăрăшать.
Юлашки вăхăтра патшалăх нумай ачаллă çемьесене ытларах тимлĕх уйăрать. Федерацин «Нумай ачаллă çемьесене патшалăх пулăшăвĕ парасси çинчен» саккунпа килĕшÿллĕн иккĕмĕш, виççĕмĕш тата ытларах ачаллă çемьесем амăшĕн /çемье/ капиталне тивĕçеççĕ. Уявра Елчĕкри Эвелина Ильиничнăпа Владимир Юрьевич Егоровсем, Таяпа Энтринчи Ольга Владимировнăпа Алексей Иванович Андреевсем маларах асăннă сертификата, Тăрăмри Ирина Александровнăпа Олег Вячеславович Кирилловсем «Чăваш Республикинче нумай ачаллă çемьесене çĕр лаптăкĕ парасси çинчен» саккунĕпе килĕшÿллĕн харпăр хăй хуçалăхне йĕркелеме çĕр лаптăкĕ уйăрнине ĕнентерекен сертификата илме тивĕç пулчĕç. Вĕсене район администрацийĕн пуçлăхĕн пĕрремĕш çумĕ-вĕренÿпе çамрăксен политикин пайĕн ертÿçи Л.Левый саламларĕ.
Уява хутшăннă çемьесене «Единая Россия» партин Елчĕкри уйрăмĕн ертÿçи Л.Павлова, ĕçтешĕсем, çывăх çыннисем парнесемпе чĕрĕ чечексем парса саламларĕç. Елчĕкри культработниксем çемьесен ячĕпе илемлĕ юрăсем шăрантарчĕç. Юлашкинчен уява хутшăннисем асăнмалăх сăн ÿкерттерчĕç.
В.АЛЕКСЕЕВА.