14 мая 2016 г.
«Колос» ялхуçалăх производство кооперативĕнче сăвăнакан ĕнесен кĕтĕвне икĕ эрне каяллах ешĕл калча çине илсе тухнă.
Кăçал ака уйăхĕн пуçламăшĕнченех ăшă çанталăк тăнăран кĕрхи культурăсемпе нумай çул ÿсекен курăксем хăвăрт ÿссе çитĕнчĕç.
- Ура айĕнчи симĕс апатпа маларах усă курма тытăнни тата ĕне выльăхсене тăрантарма ятарласа уйăрнă лаптăксенчи кĕрхи культурăсемпе нумай çул ÿсекен курăксем парка çитĕнни пахалăхлă тата кирлĕ шайри продукци туса илес шанăçа тата ÿстерет, - тет ялхуçалăх предприятийĕн ертÿçи Николай Зайцев.
Ферма çывăхĕнчи 350 гектар йышăнакан лаптăка ятарласа кĕтÿ çÿретме уйăрнă. 70 гектар çинчи кĕрхи тулă парка та тăкăс çитĕннĕ. Ĕнесем ăна çăвар туллин çиеççĕ. Вĕсене симĕс апатпа пĕрлех хĕллехинчен кая мар çăнăхпа, жмыхпа тăрантараççĕ. Çавна май сăвăм та палăрмаллах ÿснĕ.
Выльăх-чĕрлĕх отрасльне малалла аталантарассине тĕп вырăна хуракан ялхуçалăх предприятийĕнче кăçалхи 4 уйăхра 1603 центнер, пĕр ĕнерен 1498 килограмм сĕт сунă. Кăтартусем кашни çул ÿссе пыраççĕ. Тĕллев - çуллахи тапхăрта ура айĕнчи йÿнĕ апатпа усă курса тата ытларах продукци туса илесси, ĕçлесе хатĕрлекен предприятисене паха продукци ытларах сутасси. Мĕн палăртнине пурнăçласси халĕ дояркăсенчен анчах мар, кĕтÿçĕсенчен те нумай килет. Яваплă ĕçе пурнăçлама Олег Беловпа Владислав Краснова /сăнÿкерчĕкре/ çирĕплетнĕ.