14 мая 2016 г.
Педагогсен династийĕ
Республикăра ĕç династийĕсен слетне йĕркелесси ырă йăлана кĕнĕ.
Кăçал район чысне республика шайĕнче Курнавăшри Смирновсем хÿтĕленĕ. Вĕсен вĕрентÿ сферинчи ĕç стажĕ - 502 çул. Учительсен йăхне пуçараканĕ - Чăваш АССРĕн, РСФСРĕн тава тивĕçлĕ учителĕ Петр Михайлович Смирнов.
Династие паян П.Смирновăн ывăлĕ Алексей Петрович тата хĕрĕсем Елена Петровнăпа Светлана Петровна малалла тăсаççĕ. Çавăн пекех кинĕпе мăнукĕсем, ытти тăванĕ те вĕрентÿ ĕçĕнче тăрăшаççĕ. Слетра Алексей Петровича ЧР Пуçлăхĕ Михаил Игнатьев ятран сехет парнеленĕ.
Хирте – агитбригада
Аслă Таяпари культура ĕçченĕсем яланах хресченпе юнашар пулма тăрăшаççĕ.
«Ылтăн пучах» агитбригада членĕсем, Ю.Амаюков тата В.Семенов хресчен /фермер/ хуçалăхĕсенче пулса, çĕр ĕçченĕсене илемлĕ юрăсемпе савăнтарнă.
«Çĕнтерÿ вальсĕ»
Канаш хулин Культура керменĕнче «Çĕнтерÿ вальсĕ» конкурсăн зонăри тапхăрĕ иртнĕ.
Бал ташшисен конкурсне кÿршĕ районсемпе пĕрле Елчĕк шкулĕнче кадет класĕнче вĕренекенсем те хутшăннă. Тĕрлĕ енлĕ тупăшу витĕр тухса Елчĕксем виççĕмĕш вырăн йышăннă. «Бал ташшин чи лайăх мăшăрĕ» номинацире вара 6 «к» класри Мария Николаевăпа Данил Куприянов чи лайăххисен йышне кĕнĕ.
Тăван ял сцени çинче
Лаш Таяпари культура çуртĕнче час-часах пулаççĕ чăваш эстрада юрăçисем.
Хальхинче çак ялта çуралса ÿснĕ çамрăк юрăç-композитор Юрий Кашкăр тата Полина Борисова, Владимир Янтуш юрăçсем ял халăхне илемлĕ юрă-кĕвĕпе, шÿтсемпе тыткăнланă. Куракансем концерт вĕсен асĕнче нумайлăха юлассине палăртнă.
Бриллиант туйне паллă тунă
Каркаларти Мурзинсем çемье çавăрни 60 çул çитнине тулли кĕрекере кĕтсе илнĕ.
Николай Христофоровичпа Лидия Степановна виçĕ хĕрпе тăватă ывăл çитĕнтернĕ. Ĕмĕрĕсене фермăра ĕçлесе ирттернĕ. Ĕç ветеранĕсем ял çинче пысăк хисепре. Сумлă ватăсене Кĕçĕн Таяпа ял тăрăхĕн пуçлăхĕ В.Петров, культура ĕçченĕсем, ачисемпе тăванĕсем саламланă.
Салам открытки
Кĕçĕн Таяпари Раиса Головина тыл ветеранĕ тăхăр теçетке çула хыçа хăварнă.
Раиса Кузьминичнăна Раççей Президенчĕ В.Путин салам открытки янă. Ăна Кĕçĕн Таяпа ял тăрăхĕн специалисчĕсемпе культработникĕсем ăшшăн саламланă, парнепе чысланă.
Ăслă кăна мар, илемлĕ те
2014 çулта Кушкă шкулĕнчен медальпе вĕренсе тухнă Алиса Портнова Мускаври патшалăх университетĕнче дизайнпа технологи факультетĕнче иккĕмĕш курсра вĕренет.
Аслă шкулта пысăклатнă стипенди илет пултаруллă та пысăк тавракурăмлă хĕр. Вĕренÿре кăна мар, общество пурнăçне те активлă хутшăнать чăваш пики. Алиса «Университет пики-2016» конкурс çĕнтерÿçи пулса тăнă. Конкурс спонсорĕсем хĕре тĕп приз - çулçÿреве кайма путевка тата тĕрлĕ центрсемпе илемлĕх студийĕсене çÿреме сертификатсем парнеленĕ. Малашне Алиса сăнне тĕрлĕ мода журналĕсенче курăпăр.