14 мая 2016 г.
Сисмерĕмĕр те - май уйăхĕн çуррине çитрĕмĕр. Юлашки шăнкăравччен шутлă кунсем юлчĕç. Унтан тăххăрмĕшсемпе вунпĕрмĕшсен хĕрÿ кунсем - экзаменсем пуçланаççĕ. Патшалăхăн пĕрлехи экзаменне ăнăçлă тытас текен выпускниксем хальхи вăхăтра хăйсем суйласа илнĕ, обязательнăй предметсене алăран ямаççĕ.
Кăçал районти вăтам шкулсенчен 148 ача вĕренсе тухать. Вунпĕрмĕшсем обязательнăй майпа унчченхи пекех икĕ предметпа патшалăхăн пĕрлехи экзаменне тытаççĕ. Кăçал ППЭра хăш-пĕр улшăнусем пур. Калăпăр, чылай предметсенче тест пайĕ çук. Ют чĕлхепе те экзамен икĕ пайран тăрать - сăмахпа каласа тата çырса. Тата кăçал сăмахпа калассине икĕ кун уйăрса панă. Выпускниксенчен обществознани предмечĕпе ППЭ тытас текенсем йышлă пулнăран ун валли ятарласа пĕр кун уйăрнă. Математикăпа вара вĕренекен икĕ вариантран пĕрне суйласа илме пултарать: математика енĕпе аслă шкула вĕренме кайманнисем никĕс шайне пĕлни те çителĕклĕ, аслă шкулта математика кирлисем профильлĕ майпа та хăйсене тĕрĕслĕç.
Пĕрремĕш экзаменсем май уйăхĕн 27-мĕшĕнче пуçланаççĕ. Географипе вырăс литератури тытакансем Канаш хулинчи 1-мĕш номерлĕ шкулта хăйсен пĕлĕвне тĕрĕслеççĕ. Май уйăхĕн 30-мĕшĕнче /сăмах май каласа хăваратăп, обязательнăй йĕркепе тытмалли экзаменсем Елчĕкри пĕтĕмĕшле пĕлÿ паракан вăтам шкулта иртеççĕ/ ачасем вырăс чĕлхипе хăйсен пĕлĕвне тĕрĕслеççĕ. Математикăпа никĕс шайне июнĕн 2-мĕшĕнче, профиль шайне июнĕн 6-мĕшĕнче тытаççĕ.
Выпускниксенчен ытларахăшĕ /90 вĕренекен/ кăçал та обществознани предметне суйласа илнĕ. Çавăн пекех Елчĕке Комсомольски районĕнчи 133 вĕренекен çак предметпа экзамен тытма килĕ. Акăлчан чĕлхине кăмăллакансен /сăмахпа калассипе/ Шупашкар хулинчи 24-мĕш шкулах çитме тивĕ. Июнĕн 14-мĕшĕнче биологи тата акăлчан чĕлхи /çырса/ тытакансем Комсомольскинчи 2-мĕш номерлĕ шкулта, июнĕн 16-мĕшĕнче информатикăпа, историпе Патăрьелĕнчи 1-мĕш номерлĕ шкулта тытĕç. Выпускниксем физика тата хими предмечĕсене кăмăллани те курăнать. 65 вĕренекен физика, 24 вĕренекен хими предмечĕсене тытма кăмăл тунă. Вĕсен экзаменĕсем Елчĕкре иртеççĕ. Çавăн пекех Елчĕксемпе пĕрле Комсомольски районĕн выпускникĕсем хăйсен пĕлĕвне тĕрĕслĕç.
Маларах палăртнă кунсенче ППЭ тытма хутшăнайманнисем валли кашни предметпа резерв кунĕ - июнĕн 30-мĕшне палăртнă. Вăл Шупашкарти 24-мĕш номерлĕ шкулта иртĕ.
Аттестат илес тесен вырăс чĕлхипе 24 балран кая мар пуçтармалла, математикăпа никĕс шайĕнче «вăтам» хак илмелле.
ППЭ йĕркеллĕ иртчĕр тесе кашни аудиторинче веб-камерăсем вырнаçтарнă, вĕсем онлайн режимĕпе ĕçлеççĕ. Енчен те выпускник патшалăхăн пĕрлехи экзаменĕнчи йĕркесене пăссан, усă курма юраман япаласем илсе кĕрсен, ăна аудиторинчен кăларса яраççĕ. Вăл вара экзаменсене çитес çул кăна тытма пултарать.
Хальхи вăхăтра пĕтĕмĕшле пĕлÿ паракан вăтам шкулсенче экзаменсене хатĕрленес ĕç пырать. Шкулсенче ăнлантару стенчĕсем вырнаçтарнă. Майăн 12-мĕшĕнче ЧР Вĕренÿпе çамрăксен политикин министерстви ППЭ ыйтăвĕсем пирки ашшĕ-амăшĕсен черетлĕ пухăвне видеоконференци мелĕпе ирттерчĕ. Унта ашшĕ-амăшне, выпускниксене хумхантаракан ыйтусене сÿтсе яврĕç.
А.БОГДАНОВА.