07 мая 2016 г.
Майăн 1-мĕшĕнче Шупашкарта Çуркунне тата Ĕç уявне хисеплесе савăнăçлă мероприяти иртнĕ. Кăçал Майăн 1-мĕшĕ ячĕпе йĕркеленĕ демонстрацине республикăн тĕп хулинче пурăнакансемпе хăнасем - 32 пин ытла çын - хутшăннă. Политика партийĕсенчен, профсоюзсенчен, Шупашкарти организаципе предприятисенче ĕçлекенсенчен йĕркеленнĕ колонна тĕп урамсемпе утса тухнă хыççăн Хĕрлĕ лапама пуçтарăннă. «Единая Россия» парти представителĕсем нумаййăн пулнă, çакă вăл ертсе пыраканнисенчен пĕри пулнипе те çыхăннă.
Çуркунне тата Ĕç уявне çулленех ватти-вĕтти те хутшăнать. Чылайăшĕ мероприяти савăнăçлă кăмăл, хамăр çĕршывшăн мăнаçлăх тата çутă малашлăх валли шанчăк çуратнине палăртаççĕ. Çак кун çамрăксем хăйсем ача чухне демонстрацине тухнине аса илеççĕ, аслисем тепĕр хут яшлăха таврăнаççĕ.
Чăваш Патшалăх Канашĕн депутачĕ, «Единая Россия» партин регионти уйрăмĕн секретарĕ Николай Малов Майăн пĕрремĕшĕнчи уява хутшăнса çынсем çапла майпа хамăр çĕршыв историне, ĕç çыннине, ветерансене сума сунине палăртнă.
«Чăваш Енре 2016 çул - Ĕç çыннин çулталăкĕ. Çак çулталăк тата уяв пирĕнте тата та ытларах яваплăх çуратать, апла пулсан пирĕн хамăр умри тивĕçе, палăртнă тĕллевсене пурнăçламалла», - тенĕ Николай Малов Мăнкун ячĕпе христиансене саламласа Ĕненÿ, Шанчăк тата Юрату суннă май.