07 мая 2016 г.
«Ростелекомăн» Чăваш Республикинчи филиалĕн Канаш хулинчи центрĕн Елчĕкри линипе техника узелĕн электроçыхăну инженерне Олег Феофанович Муравьева райцентрта пĕлмен çын та çук пулĕ. Çыхăну отраслĕнче 38 çул тăрăшать вăл. Çартан килнĕ хыççăн кунта монтера ĕçе вырнаçнă та паянхи кунччен юратнă ĕçре тăрăшать. Мĕн ачаран, каярахра салтакра радиоэлектроникăпа кăсăкланнăскертен Елчĕкре пурăнакансем тăтăшах пулăшу ыйтаççĕ.
Çыхăну отраслĕ пĕр вĕçĕмсĕр аталанать, çавна май ĕçĕ те тăкăсланать. Районта электроçыхăну йĕркелекенсем хăйсен ĕçне çÿллĕ шайра пурнăçлаççĕ. Ăста специалистсем тăрăшаççĕ кунта. Олег Феофанович коллективра чи хисеплĕ çынсенчен пĕри. Ахальтен мар унăн сăнÿкерчĕкне районти Хисеп хăми çине кĕртнĕ.
Сăнÿкерчĕкре: О.Муравьев.