05 мая 2016 г.
Ĕнер район администрацийĕн пуçлăхĕ Николай Миллин район администрацийĕн структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Район администрацийĕн пуçлăхĕн пĕрремĕш çумĕ - вĕренÿпе çамрăксен политикин пайĕн ертÿçи Леонард Левый Раççей Чрезвычайлă лару-тăру министерстви апрелĕн 25-28-мĕшĕсенче пĕтĕм çĕршывĕпе йĕркеленĕ командăпа штаб вĕренĕвĕ Елчĕк районĕнче мĕнле иртнипе паллаштарчĕ. Вăл районта йĕркеллĕ иртнĕ. Анчах кĕтмен çĕртен сиксе тухакан инкексенчен сыхланассинче халĕ пурнăçламалли ĕçсене те аса илтернĕ. Акă, пушар машинисем шыв илмелли вырăнсене тепĕр хут тĕрĕслесе тухса йĕркене кĕртмелле, шыв пичкисене тултарса хумалла, огнетушительсем предприятисемпе организацисенче кăна мар, уйрăм çынсен хуçалăхĕсенче те пулмалла. Вĕсен хакĕ пысăках мар - вăтамран 450 тенкĕ. Пушар тухас пулсан огнетушительпе вут-çулăм алхасса кайиччен, пушарнăйсем киличчен сÿнтерме пулать. Халĕ уйрăм хуçалăхсенче огнетушительсем туянма тытăннă ĕнтĕ. «Хамăр хăрушсăрлăхшăн чи малтан хамăрăн тăрăшмалла», - терĕ Леонард Левый.
Мăнкун уявĕпе Майăн 1-мĕшĕ пĕр кун килчĕç. Мăнкун умĕн чиркĕве çÿрекенсен кĕлĕрен çĕрле тухмалла пулчĕ. Анчах урамсенче сĕм тĕттĕм. Çутăсене ытти чухнехи пекех çутса тăнă. Малашне чиркÿллĕ ялсенче урамсене кĕлĕ вĕçлениччен çутатассине шута илмелле.
Февралĕн 9-мĕшĕнче республикăра «Ачалăхшăн. Ачалăх ячĕпе» ыркăмăллăх марафонĕ пуçланчĕ. Вăл май уйăхĕн юлашки кунĕчченех пырать. Район администрацийĕн пуçлăхĕн пĕрремĕш çумĕ вăл районта мĕнле пыни çинчен каласа пачĕ. Апрелĕн 27-мĕшĕ тĕлне районта марафон счечĕ çине 199482 тенкĕ куçнă. Ку вăл пĕлтĕрхи шайран пысăкрах-ха. Анчах кÿршĕллĕ, халăх йышĕпе пирĕн пек е пĕчĕкрех районсен кăтартăвĕсем чылай пысăкрах иккен. Ялхуçалăх производство предприятийĕсен, хресчен /фермер/ хуçалăхĕсен çурри, уйрăмах хăй тĕллĕн ĕçлекен предпринимательсем питĕ сахал хутшăнни пăшăрхантарать. Елчĕк ял тăрăхĕнчен Валерий Изратов предприниматель çак сăваплă ĕçе хутшăннă. Ытти ял тăрăхĕсенче те çакнашкал тĕслĕх. Ыркăмăллăх марафонĕ, паллах, çынсем хăйсен ирĕкĕпе хутшăнмалли япала. Çапах та унта пуçтарăннă укçа-тенкĕ пĕр пус таранччен хамăр патăмăртах юлнине, ăна тăлăх ачасене, ача сачĕсене пулăшма уйăрнине шута илмеллех.
Леонард Левый Аслă Çĕнтерÿ уявне хатĕрленсе кĕтсе илесси, ирттерсе ярасси çинче те чарăнса тăчĕ. Ялсенче уяв мероприятийĕсем май уйăхĕн 8-мĕшĕнче пулаççĕ. Çав кунах район центрĕнче факелсем йăтса утасси иртет. Тепĕр кунне Елчĕкри тĕп лапамра савăнăçлă митинг, ытти мероприятисем 10 сехетре пуçланĕç. Вĕсене йĕркелекенсем уяв кăçал та илĕртÿллĕ, кăсăклă пуласса шантараççĕ.
Район администрацийĕн ялхуçалăх пайĕн начальникĕ Петр Тремасов уй-хир ĕçĕсем мĕнле пынипе паллаштарчĕ. Тĕпрен илсен палăртнă ĕçсем пурнăçланса пыраççĕ. Ĕнерхи кун тĕлне «Победа» ООО пĕрчĕллĕ тата пăрçа йышши культурăсене 100 процент, «Прогресс» АХОра 85 процент акнă. Çапах та, район администрацийĕн пуçлăхĕ Николай Миллин палăртнă тăрăх, хăш-пĕр хуçалăхсенче çурхи ĕçсем тивĕçлĕ шайра пымаççĕ. Вĕсен шутне утăлăх тата сенажлăх пĕр çул ÿсекен курăксене паянхи кун та акса пĕтерменни кĕрет. Çапла вара çурхи культурăсем пĕр вăхăтра пулса çитеççĕ. Çавна май выльăх апачĕ хатĕрлесси те, тыр-пул пухса кĕртесси те пĕр вăхăта лекет, ĕçе тăкăслатать. Нумай çул ÿсекен, кĕрхи культурăсене минераллă удобренисемпе апатлантарассин тата сÿрелессин вăхăчĕ те иртсе пырать.
Канашлура район пурнăçĕпе çыхăннă ытти ыйтусене те сÿтсе явнă.