30 апреля 2016 г.
Йошкар-Ола хулинче пулса иртнĕ «Форум действий. Регионы» Раççейри халăх фрончĕн пленарлă ларăвĕнче Çĕнĕ Шупашкарти йăлара усă курнă хытă каяшсене вырнаçтаракан полигон пирки Раççей Президентне Владимир Путина ыйту панă. Çĕнĕ полигон хута кайнăранпа йăлара усă курнă хытă каяшсене вырнаçтарассин тарифĕ регионра 16 хут ÿснĕ, имĕш.
Чăваш Республикинчи Строительство, архитектура, пурăнмалли çурт-йĕрпе коммуналлă хуçалăх министерствинчен пĕлтернĕ тăрăх, халăха пулăшу ĕçĕсемпе тивĕçтернин - çÿп-çапа пухса ĕçе янин хакне «16 хут ÿстернĕ» тени чăнлăхпа килĕшсе тăма пултараймасть.
2015 çулхи ноябрĕн 1-мĕшĕччен йăлара усă курнă хытă каяшсене Шупашкар хулинчи ирĕк панă свалкăна вырнаçтарнă. Пулăшу ĕçĕн тарифĕ, 1 кубла метр пуçне шутласан, 43,79 тенкĕпе танлашнă. Анчах çÿп-çапа купапа пухса ĕçе яни çутçанталăк сыхлавĕн законодательствипе килĕшÿллĕн ыйтнине тивĕçтермен. Çав вăхăтрах Шупашкарта тата Çĕнĕ Шупашкарта пурăнакансем пулăшу ĕçĕсемшĕн - 1 кубла метршăн 157,80 тенкĕ тÿленĕ.
2005 çулхи июлĕн 21-мĕшĕнчи /115-мĕш номер/ «Концесси килĕшĕвĕсем çинчен» Федераци саккунĕпе килĕшÿллĕн 2014 çулхи июлĕн 1-мĕшĕнче Чăваш Республикинчи Çутçанталăк ресурсĕсемпе экологи министерстви тата «Каяшсене тытса пырасси» хупă акционерсен обществи концесси килĕшĕвĕ çине алă пуснă. Унпа килĕшÿллĕн Шупашкар хулинче пĕр çулталăкра 150 пин тонна çÿп-çапа сортлама пултаракан комплекс тата ăна куçарса тиекен çĕнĕ йышши станци туса лартнă. Ку чухне çÿп-çап турттаракан çĕнĕ йышши техникăсемпе усă курнине пула хальхи вăхăтра çÿп-çапа халăхран тата юридика сăпатĕнчи çынсенчен пухса ĕçе янăшăн тÿлесси /1 кубла метршăн/ Шупашкар тата Çĕнĕ Шупашкар хулисенче малтанхи 157,80 тенкĕ вырăнне 200 тенкĕ таран ÿснĕ, пĕр тăваткал метр пуçне шутласан, вăтамран 1,4-1,5 тенкĕпе танлашать. 50 тăваткал метр йышăнакан хваттерте 3 çынран тăракан çемье малтан пĕр уйăхра 18,3 тенкĕ тÿленĕ, халĕ - 25 тенкĕ. Çапла майпа çурт-йĕре тытса тăнăшăн пĕр çын пуçне тÿлемелли пулăшу ĕçĕсен хакĕ пĕр уйăхра вăтамран 7 тенкĕ ÿснĕ.