30 апреля 2016 г.
Кăçал Раççейре пушар хуралĕн çулталăкĕ тесе палăртнă май пушар хăрушсăрлăхĕн правилисене вĕрентес тĕллевпе час-часах шкулсенче, ача сачĕсенче пулса профилактика кунĕсем, сехечĕсем йĕркелетпĕр. Çавăн пекех ачасемпе çамрăксем хушшинче тĕрлĕ конкурссем иртеççĕ. Вĕсенчен пĕри - Раççей шайĕнчи «Неопалимая Купина» конкурс.
Ачасен ĕçĕсене ÿсĕмне кура виçĕ номинаципе йĕркеленĕ. Конкурс малтанах районта иртнĕ. Елчĕкри çĕнтерÿçĕсемпе призерсен ĕçĕсене республикăна тăратнă.
Республикăри 6-10 çулхи ачасем хушшинче, «Пушар машини» ÿкерсе Елчĕкри искусство шкулĕнче ăсталăхне туптакан Дарья Патшина пĕрремĕш вырăн йышăннă.
Çак ÿсĕмри Артем Журавлев /Таяпа Энтри шкулĕ/ «Çăлавçăсем» декораципе пĕрремĕш, Даниил Кириллов /Елчĕк шкулĕ/ «Вăрмана упрăр» аппликаципе виççĕмĕш, Тихон Пушков /Елчĕк шкулĕ/ «Пушар карети» макет ăсталаса иккĕмĕш вырăн йышăннă. Вĕсене алĕç ăсталăхне вĕрентекен Р.Парферьева, Р.Макарова, О.Кузьмина, С.Долгов педагогсем ырă ята тивĕçлĕ.
А.САЙКИН,
пушар асăрхавĕн районти инспекцийĕн начальникĕ.