30 апреля 2016 г.
Чăваш халăхĕ мĕн авалтан çурхи шывпа хура-марана тасатнă. Ял çыннисем çак ĕçе халĕ те çирĕп пăхăнса тытса пыраççĕ.
Аслă Пăла Тимешĕнчи тĕлĕнмелле ĕçсем тăвакан таса Николай ячĕпе хисепленсе тăракан чиркĕве çÿрекен çынсем иртнĕ кунсенче унта ирех пухăнчĕç. Ватăсем аслă Мăнкун явне кĕтсе илме хатĕрленсе чиркÿ çуртне çуса тасатма канаш турĕç. Кушкă, Исемпел ялĕсенчен те килчĕç пулăшма кăмăл тăвакансем. Иерей Алексей атте пурне те пил парса ĕçлеме ирĕк пачĕ.
Ушкăнпа пулсан ĕç те кал-кал пырать. Чиркÿре чун ыйтнипе ĕçлесе тăракансем: Валентина Викторова, Юлия Федорова, Раиса Сапожникова, Галина Козлова, Галина Горбунова, Надежда Трифонова, Антонина Петрова пынă çынсене ертсе пырса пысăк ĕç тутарчĕç - чиркÿ çуртне, часавая тасатрĕç.
Пĕр кун ĕçленипе анчах мар, куллен туса пымалли ĕçсем те нумай кунта. Чиркÿ картишне, йывăç-чечексене пурне те чиркĕве çÿрекенсем пулăшнипе тасатса-тирпейлесе пурăнаççĕ. «Пархатарлă ĕç тăвакансене Турă пулăшса пытăр», - тесе калас килет.
З.ПОРТНОВА,
Аслă Пăла Тимешĕнчи ĕçпе вăрçă ветеранĕсен пуçламăш организацийĕн председателĕ.