27 апреля 2016 г.
Район администрацийĕн пуçлăхĕ Николай Миллин райадминистрацин структура подразделенийĕсен, ял тăрăхĕсен, предприятисемпе организацисен ертÿçисемпе канашлу ирттернĕ.
Вăл ĕçре палăрнисене наградăсем панинчен пуçланчĕ. Район администрацийĕн пуçлăхĕ 2015 çулта çĕршывра иртнĕ Литература çулталăкĕнче палăрнисене - тĕп библиотекăн краеведени секторĕн заведующине Людмила Зайцевăна, Çирĕклĕ Шăхалĕнчи вăтам шкул директорĕн çумне Нина Леваяна «Кĕнеке ĕçĕнчи тава тивĕçлĕ ĕçсемшĕн» медальпе, «Елчĕк районĕнчи пушар хуралне 55 çул» асăнмалăх медальпе «Яманчурино» ООО ертÿçине Владимир Рахмуллина тата райадминистраци работникне Николай Карабурнашева чысларĕ. «Чăваш Республикинчи чи лайăх муниципалитет пĕрлĕхĕ» конкурсра Çирĕклĕ Шăхаль ял тăрăхĕн ертÿçи Леонид Кошкин «Чи лайăх муниципалитет пĕрлĕхĕн ертÿçи», Аслă Елчĕк ял тăрăхĕ «Чи лайăх ял тăрăхĕ» номинацисенче финала тухнă. Николай Петрович вĕсене республикăри муниципалитет пĕрлĕхĕн Хисеп грамотисене парса чыс турĕ.
Районта уй-хир ĕçĕсем мĕнле пынипе ялхуçалăх пайĕн начальникĕ Петр Тремасов паллаштарчĕ.
Елчĕк районĕнчи ветеринари лару-тăрăвĕ çинчен выльăх-чĕрлĕх чирĕсене хирĕç кĕрешекен станци начальникĕ Ирина Николаева каласа пачĕ. Ветеринари работникĕсем выльăхсене, килти чĕрчуна бруцеллез, лейкоз, уртаракан чирсем ересрен прививкăсем тăваççĕ, хуçисемпе профилактика ĕçĕсем туса ирттереççĕ. Уйрăмах сыснасене Африка чуми ересрен сысна фермисенче ветеринарипе санитари нормисене мĕнле пурнăçласа пынине тĕрĕслесе, кĕтмен инкеке сирсе ярассишĕн хатĕр тăраççĕ. Хальхи вăхăтра сысна фермисем хупă режимпа ĕçлеççĕ. Анчах çакă теприсемшĕн сысна ĕрчетмелли мар хăйне евĕрлĕ сăлтав пулса тăнă - вĕсене усрама чарăннă. Çăмăл меслет. Çакна район администрацийĕн пуçлăхĕ сивлерĕ.
Район администрацийĕн пуçлăхĕн пĕрремĕш çумĕ Леонард Левый пĕлтернĕ тăрăх, пĕтĕм Раççейри пекех районта та апрелĕн 25-28-мĕшĕсенче шыв-шур илнине, типĕ курăка çунтарнине тата вăрманта пушара пула сиксе тухнă черезвычайлă лару-тăрăва пĕтерме хăнăхмалли вĕренÿ пулать. Унăн тĕп тĕллевĕ - пушар тухнă, шыв-шур илнĕ самантсенче инкек-синкекрен сыхланмалли хатĕрсемпе, тĕрлĕ техникăпа мĕнле усă курнине, халăх пурнăçăшĕн пысăк пĕлтерĕшлĕ объектсене ĕçлеттерме хатĕр пулнине тишкересси.
Çавăн пекех Леонард Левый Чăваш Республикин патшалăх символĕсен кунне, Майăн 1-мĕшне, Мăнкуна, Аслă Çĕнтерÿ кунне хатĕрленсе ирттерес ыйтусене хускатнă.