27 апреля 2016 г.
Тăрăм ял тăрăхĕнче пурăнакансем çуркуннехи тапхăрти экологи субботникне кăçал та, ытти çулсенчи пекех, хастар хутшăнаççĕ.
Çак тапхăрта Тăрăмри тата Хĕрлĕçыр ялĕсенчи культура çурчĕсен, Тăрăмра, Анатри Тимешре, Хĕрлĕçырта вăрçăра вилнисене асăнса лартнă палăксен çывăхне, Тăрмăш тата ял масарĕсен территорине, малтан çак вырăнсене кĕркуннехи-хĕллехи тапхăрта пухăннă çÿп-çапа тасатнă хыççăн, пурĕ 600 тĕп чăрăш лартса хăварнă. Хунавсене Шăмăршăри питомникран кÿрсе килнĕ.
Тăрмăшри Валентина Соловьева тата Зинаида Тихонова, ял тăрăхĕнчи Депутатсен пухăвĕн депутачĕ - Лилия Осипова, Тăрăмри Валерий Кириллов, Михаил Баймушкин, Николай Григорьев, Митрофан Багадеров, Елена Игнатюк, Владимир Ефимов, Иосиф Афанасьев, Николай Чернов, Василий Якимов ĕç ветеранĕсем хăйсен пуçарăвĕпе ыттисене те пархатарлă ĕçе хутшăнма хистеççĕ, çапла майпа çитĕнекен ăрăва хăйсен ырă тĕслĕхĕпе хавхалантараççĕ.
«Рассвет» ялхуçалăх производство кооперативĕнчи механизаторсем те йывăç лартнă вăхăтра ниçта пăрăнмасăр вăй хучĕç. Ялхуçалăх предприятийĕн ертÿçи, районти Депутатсен пухăвĕн депутачĕ Юрий Мясников çакăн валли ятарласа техника уйăрса пачĕ. Вĕренÿ, культура учрежденийĕсен коллективĕсемпе шкул ачисем те ĕçре пысăк хастарлăх кăтартрĕç.
Анатри Тимешри экологи субботникне те вырăнти Депутатсен пухăвĕн депутачĕсем Олег Гавриловпа Олег Александров, ял тăрăхĕн администрацийĕн специалисчĕ Ирина Петрова ертсе пынипе йĕркелесе ирттерчĕç. Аслисемпе пĕрле кунта шкул ачисем те вăй хучĕç. Чи кĕçĕнни Тăрăмри шкулта пĕрремĕш класра вĕренекен Галя Леонтьева пулчĕ. Юля Соловьева, Настя Демьянова, Петровсем - Павел тата Ульяна, Гаврил Гаврилов, Андрей Соловьев, Артем Артемьев, Вадим Александров, Виктор Шаурбин, Миша Петров та хастар пулчĕç.
Евдокия Каширина, Елена Капитонова, Анатолий Коновалов, Мария Острова Хĕрлĕçырти масарта чăрăш тата хыр тĕмĕсене лартса хăварчĕç.
Ялти клуб заведующийĕ Зинаида Тихонова тата Елена Капитонова библиотекарь хальхи вăхăтра ырă-сывах пурăнакан вăрçă ветеранĕпе - Петр Михайлович Михайловпа тĕл пулсан Майăн 9-мĕшĕ умĕн унран хăйсемпе пĕрле Çĕнтерÿ йывăçне лартма чĕннине ветеран чун-чĕререн савăнса йышăнчĕ.
Л.СМИРНОВА,
Тăрăм ял тăрăхĕн пуçлăхĕн çумĕ.